# Afrikaans HL Grade 12 P1 Eastern Cape Mock 2012 QP > Grade 12 Afrikaans HL Paper 1 question paper from the Eastern Cape Mock Exam 2012, 12 pages. Read online or download the free PDF. - Page: https://www.hlayiso.com/library/gr12-afrhl-p1-s12-qp-afr/45426aaa-5053-45f1-b18f-ac0707b3b66c - Updated: 2026-09-27 - Subject: Afrikaans HL - Grade: Grade 12 - Document type: Question paper - Year: 2012 - Exam period: Eastern Cape Mock Exam - Paper: 1 - Curriculum: CAPS - Pages: 12 Breadcrumbs: [Home](https://www.hlayiso.com/) › [Library](https://www.hlayiso.com/library) › [Grade 12](https://www.hlayiso.com/library/grade-12) › [Afrikaans HL](https://www.hlayiso.com/library/grade-12/afrikaans-hl) › [Afrikaans HL Grade 12 P1 Eastern Cape Mock 2012 QP](https://www.hlayiso.com/library/gr12-afrhl-p1-s12-qp-afr/45426aaa-5053-45f1-b18f-ac0707b3b66c) ## About this document Afrikaans Hl · Grade 12 · Eastern Cape Mock Exam · 2012. Question paper, 12 pages. Read online or download the PDF. Read it free online on the page above; download the PDF from there. ## Document text Text extracted from the PDF. Layout, diagrams and tables may not survive extraction. ### Page 1 Downloaded from hlayiso.com Province of the EASTERN CAPE EDUCATION NASIONALE SENIOR SERTIFIKAAT GRAAD 12 SEPTEMBER 2012 AFRIKAANS HUISTAAL V1 PUNTE: 70 TYD: 2 uur *AFRHL1* Hierdie vraestel bestaan uit 12 bladsye. ### Page 2 Downloaded from hlayiso.com 2 AFRIKAANS HUISTAAL V1 (SEPTEMBER 2012) INSTRUKSIES EN INLIGTING 1. Hierdie vraestel bestaan uit DRIE afdelings: AFDELING A: Leesbegrip (30) AFDELING B: Opsomming (10) AFDELING C: Taal (30) 2. Lees ALLE instruksies noukeurig deur. 3. Beantwoord AL die vrae. 4. Trek ʼn streep na elke afdeling. 5. Nommer die antwoorde korrek volgens die nommeringstelsel wat in hierdie vraestel gebruik is. 6. Laat ʼn reël oop na elke antwoord. 7. Gee besondere aandag aan spelling en sinsbou. 8. Skryf netjies en leesbaar. ### Page 3 Downloaded from hlayiso.com (SEPTEMBER 2012) AFRIKAANS HUISTAAL V1 3 AFDELING A: LEESBEGRIP VRAAG 1 KOERANTBERIG, SPOTPRENT EN ADVERTENSIE Lees en kyk na die onderstaande tekste en beantwoord die vrae wat daarna volg. KOERANTBERIG ROOFTRUIE STEEL BAIE WERK “Die impak en implikasies van roofprodukte is groot omdat dit die inkomste en werk van die ware kunstenaars en skeppers bedreig.” DR. ROB DAVIES, MINISTER VAN HANDEL EN NYWERHEID 1. Die Suid-Afrikaanse Inkomstediens (SAID) het die afgelope week vervalste Springbokgoedere met ʼn waarde van R43 miljoen in Johannesburg gekonfiskeer. Dit het meer as 66 000 vervalste Boktruie ingesluit. 2. Die probleem is dat die vervalste goedere heelwat goedkoper is as die amptelike produkte. Loop ʼn mens in Woolworths in, kos ʼn replika- Springboktrui jou R600. In Makro en Sportman‟s Warehouse is die prys R629,99. As ʼn mens die truie oor die internet wil bestel van webwerwe soos WorldRugbyShop.com, moet jy sowat R639 opdok. Dit sluit nie die koste in om die trui tot by jou huis te kry nie. 3. Mnr. Zobuzwe Ngobese, woordvoerder van Adidas in Suid-Afrika, sê elke keer as daar ʼn groot sportgebeurtenis soos ʼn wêreldbeker plaasvind, neem die stortvloed vervalste produkte toe. 4. Adidas het verlede jaar tydens die Wêreldbeker-sokkertoernooi ʼn groot kopseer gehad met vervalste produkte wat op straat en elders verskyn het. Dit is onseker hoeveel vervalste hemde verkoop is, maar die verkoop van vervalste truie het Adidas miljoene dollars gekos. Adidas het verlede jaar sowat 1 miljoen amptelike replikas van Bafana Bafana-hemde verkoop teen sowat R800 stuk. 5. Adidas, wat vanjaar spanne soos Nieu-Seeland en Wallis borg in die Wêreldbeker rugbytoernooi, het verlede jaar gesê dat daar ander, goedkoper produkte was wat ondersteuners kon koop indien hulle hul span wou ondersteun. ʼn Mens hoef dus nie noodwendig die duur replika te koop nie. 6. Tussen Januarie en Junie 2010 het die Suid-Afrikaanse Polisiediens vervalste produkte ter waarde van R100 miljoen gekonfiskeer. Adidas se uitgangspunt was dat dit ʼn bedryfsprobleem is en as bedryf is die probleem vasgevat. “Ons het die Polisie en ander beamptes opgelei om te kyk na die kwessie.” ### Page 4 Downloaded from hlayiso.com 4 AFRIKAANS HUISTAAL V1 (SEPTEMBER 2012) 7. Ngobese sê die geheim is om die probleem by die bron vas te vat en in Suid- Afrika is dit die hawens en lughawens. “Dit werk die beste om die produkte daar te konfiskeer, voordat dit op straat verskyn.” 8. Volgens die departement van handel en nywerheid se jongste amptelike raming kos die diefstal van intellektuele eiendom en handel in vervalste produkte Suid-Afrika jaarliks meer as R2 miljard. 9. Dr Rob Davies, minister van die departement, sê die verkopers op straat is klein vissies. “Die groot breine is die vervaardigers wat agter die skerms sit,” het Davies in ʼn onlangse toespraak gesê. 10. Die departement het aan die einde van 2010 die nasionale Anti-roof-veldtog gestig. Die doel hiervan was om bewustheid te skep oor die negatiewe uitwerking van roofprodukte. 11. “Die impak en implikasies van roofprodukte is groot omdat dit die inkomste en werk van die ware kunstenaars en skeppers bedreig,” sê Davies. 12. Hy sê vervalste goedere verlam die plaaslike vervaardigers in die klere- en die tekstielsektor. 13. Mnr. Brett Burgess, hoofbestuurder van Canterbury, (vervaardiger van die Boktrui) sê die produkte op straat lyk eg, maar die gehalte is swak. “Die namaaksels lyk in vele opsigte identies, met selfs die kentekens binnekant die truie wat lyk soos die ware Jacob. Mense moet egter weet indien hulle ʼn trui op straat koop, is die kans 100% dat die trui vervals is.” 14. Burgess sê ondersteuners wat ʼn trui wil koop en seker wil wees dis nie vervals nie, moet dit by ʼn amptelike handelaar koop. 15. Mense moet besef hulle ondersteun misdaad en die sluikhandel as hulle truie van die straat af koop. “Die rede waarom smouse die truie kan verkoop teen R150, is omdat hulle nie doeane-en-aksyns betaal nie.” 16. “Hulle betaal ook geen geld oor aan sportliggame soos SARU nie. Hulle het ook nie ʼn sent bestee aan ontwikkeling van die truie nie.” 17. Burgess sê smouse se truie word in ʼn groot mate vervaardig deur kinderarbeiders en in fabrieke waar werkers uitgebuit word. [Verwerk uit: Rapport, 04/09/11] ### Page 5 Downloaded from hlayiso.com (SEPTEMBER 2012) AFRIKAANS HUISTAAL V1 5 1.1 Waarom maak die minister van handel en nywerheid kapsie teen roofprodukte? (2) 1.2 Wat het direk aanleiding gegee tot die skryf van die berig? (1) 1.3 Hoekom wend kopers hulle tot roofprodukte? (1) 1.4 Watter afleiding maak mnr. Zobuzwe Ngobese rakende die hele problematiek? (1) 1.5 Verduidelik wat Adidas se groot kopseer was met die verskyning van die vervalste produkte tydens die Wêreldbeker-sokkertoernooi. (2) 1.6 Dink jy Adidas is nugter oor die hele kwessie? Motiveer jou antwoord uit die teks. (2) 1.7 Hoekom kan beweer word dat Adidas ʼn daadwerklike poging aangewend het om die probleem te bekamp? (2) 1.8 Hoe skakel lughawens en hawens in by die hele aangeleentheid? (2) 1.9 Waarom is roofprodukte nadelig vir ʼn land? (1) 1.10 Watter gevolge hou roofprodukte vir kunstenaars en skeppers in? (2) 1.11 Wat is veral kommerwekkend oor roofprodukte? (1) 1.12 Verklaar waarom roofprodukte ook ʼn morele kwessie aanspreek. (1) EN ### Page 6 Downloaded from hlayiso.com 6 AFRIKAANS HUISTAAL V1 (SEPTEMBER 2012) SPOTPRENT [Uit: Die Burger, 03/09/11] 1.13 Watter aktuele kwessie spreek die spotprent aan? (1) 1.14 Wat is die geïmpliseerde betekenis van die renoster se woorde? (1) 1.15 Verklaar die skilpad se gesigsuitdrukking wat na Mathilda kyk. (1) 1.16 Waarom kan die muis se woorde “Die bekendes gaan boots and all veg vir renosters” as dubbelsinnig beskou word? (2) ### Page 7 Downloaded from hlayiso.com (SEPTEMBER 2012) AFRIKAANS HUISTAAL V1 7 ADVERTENSIE SMS “CLIO” AAN 31146 VIR ʼn TOETSRIT IN DIE CLIO 1.6 S EN JY KAN DALK DAARIN HUIS TOE RY**. By sy standaard reeks koel kenmerke soos ABS-remme, ses lugsakke, 16” Wit Canasta sport-allooivellings en „S‟-spesifieke bekleedsel het ons nou nóg ʼn opwindende eienskap bygevoeg... die vervoering wat jy ervaar agter die stuur van jou nuwe Clio 1.6 S. *Dit alles kan joune wees vir ʼn deposito van 16% oor ʼn 60-maande periode met ʼn ballonpaaiement van R62 965 teen ʼn rentekoers van 5,55%. Kleinhandelprys: R179 900 (totale koste: R180 916) Kleinhandelprys in ooreenstemming met die pryslys van Augustus 2011. Pryse sluit “op-die-padkoste” uit. **Bepalings & voorwaardes geld. [Verwerk uit: Motors Bylae – Die Burger, 08/09/11] 1.17 Hoe sluit die opskrif van die advertensie by die persoon in die advertensie aan? (2) 1.18 Die Clio 1.6 S is om twee redes ʼn goeie koop. Skryf die redes onder mekaar in volsinne neer. (2) 1.19 Wat moet ʼn mens doen om die motor te wen? (1) 1.20 Waarom kan die advertensie as geslaagd beskou word? (2) TOTAAL AFDELING A: 30 ### Page 8 Downloaded from hlayiso.com 8 AFRIKAANS HUISTAAL V1 (SEPTEMBER 2012) AFDELING B: OPSOMMING VRAAG 2 Lees die onderstaande teks en maak ʼn opsomming van 7 wyses hoe om jou energievlakke op te bou. Jou opsomming moet in jou eie woorde puntsgewys aangebied word en mag nie meer as 70 woorde beslaan nie. Dui die getal woorde aan. Hupstoot vir die lente In die winter is ons energievlakke gewoonlik laag. Claudine Ryan, geregistreerde dieetkundige van die Compass Group gee raad hoe om jou energievlakke op te bou. Danksy die hoë seleniuminhoud, verlig knoffel jou gemoed en dien ook as natuurlike antidepressant. Ander bronne van selenium is Brasiliaanse neute, vis, oesters en vleis. Vitamien B1 is noodsaaklik vir normale breinfunksie en ʼn tekort lei tot lusteloosheid, moegheid en depressie. Goeie bronne sluit donkergroen groente, vrugte, suiwel en rys in. ʼn Afname in hidrasie – self net 1-2% – kan jou moeg en lusteloos laat voel. Drink agt glase water per dag om jou energievlakke te handhaaf. Kafeïen is ʼn stimulant en baie energiekos en -drankies is propvol daarvan. Dit kan tot irritasie, hoofpyn, rusteloosheid en slaapprobleme lei, wat jou nog moeër sal laat voel. ʼn Gebrek aan son en koue weer kan serotonienvlakke verlaag. Dis die brein se goedvoelhormone en ʼn gebrek daaraan kan ʼn sneller vir ʼn ligte vorm van depressie wees. Oefening is ʼn natuurlike gemoedverligter. Endorfiene word deur oefening vrygestel en dit lei tot ʼn kalm gemoed, wat tot ʼn dag kan duur. Gereelde oefening verbeter energievlakke, beveg moegheid, verlig spanning en angs en laat jou oor die algemeen goed voel. Lang rukke sonder kos verminder energievlakke, veral as jy reeds moeg en gestres is. Klein hoeveelhede koolhidraatkos deur die dag lei daartoe dat jy jou bloedglukose- en energievlakke behou. Mik vir drie middelslagetes per dag met twee tot drie ligte versnaperinge tussenin. Kos met ʼn lae Glukemiese indeks (GI) is ʼn goeie bron van volgehoue energie omdat dit stadiger in die liggaam vrygestel word en dus bloedsuikervlakke stabiel hou, wat energievlakke beheer. Moenie op suikersnoepgoed staatmaak om jou vinnig op te kikker as jy moeg voel nie. Sonlig is die beste bron van vitamien D, ʼn hormoon wat deur die liggaam vervaardig word. Lae vlakke van vitamien D hou met verlaagde energievlakke en ʼn somber gemoed verband. Verstandige sonblootstelling van vyf tot tien minute twee tot drie keer per week sal genoegsame vitamien D verseker. Blootstelling aan arms en bene is genoeg. Vitamien D kom ook in suiwelprodukte en vis voor. Sterk speserye help om kos te verteer, wat dit vinniger vir die liggaam beskikbaar maak en bloedsuikervlakke stabiliseer. Voeg paprika, brandrissies of kerrie by jou middagete vir ʼn energiehupstoot en om te keer dat jy die middag ʼn moegheid beleef. [Verwerk uit: Vrouekeur, 02/09/11] TOTAAL AFDELING B: 10 ### Page 9 Downloaded from hlayiso.com (SEPTEMBER 2012) AFRIKAANS HUISTAAL V1 9 AFDELING C: TAAL VRAAG 3 BRIEF EN STROKIESPRENTE Lees die onderstaande tekste en beantwoord die daaropvolgende vrae. “Sersant” aanwins vir haar werkgewer 1. Ek moes ʼn kleinigheid by die SA Inkomstediens op Uitenhage gaan doen en na al die stories wat ek gehoor het, het ek my klaargemaak vir ʼn lang dag in die warm son. 2. Na ongeveer twee minute se wag kom ʼn vriendelike veiligheidswag daar aan. Haar uniform is so netjies soos kan kom en sy het twee strepe op die skouer. Ek sê vir haar sy laat my aan ʼn sersant dink en blitsig kom die antwoord: “Maar ek is ʼn baie kwaai sersant, Meneer.” 3. Ek wys haar die brief wat ek ontvang het. Dadelik neem sy my na ʼn kantoortjie en oorhandig ʼn vorm wat voltooi moet word. 4. Ek groet en toe hoor ek: “ʼn Lekker dag verder, Meneer!” 5. Vanoggend (Maandag) neem ouma en ek die voltooide vorm terug. ʼn Klompie mense is reeds in die ry en toe gebeur die wonderlike. 6. ʼn Veiligheidswag met ʼn groot glimlag kom na my en ouma en wys ons ʼn ander ry waar die “ou mense” wag. Skaars gestaan, toe kom “sersant” daar aan en sy en ʼn ander wag neem ons die vertrek in waar ons op stoele kan sit. 7. Ja, ons moes ons beurt afwag, maar na slegs ʼn uur is ons met dankbare harte daar uit. Sulke proffesionele en vriendelike diens kry jy nie deesdae oral nie. 8. Ons kom buite en daar staan “sersant” weer besig om iemand te help. 9. Sy is Denise Titus, een van die vriendelikste en mees spontane mense met wie ek al te doen gekry het. Ek groet en weer die wens vir ʼn lekker dag van haar kant af. 10. Wat ons in hierdie moeilike tye nodig het, is meer van haar soort (wie / wat) met ʼn glimlag op die gesig hul daaglikse brood en botter verdien. 11. Ek weet baie mense kla soms oor onaanvaarbare diens, maar is dit nie dalk omdat die klaers nie ook ʼn vriendelike woord vir die amptenare het nie? 12. Denise Titus is ʼn aanwins vir haar werkgewer en ʼn lopende voorbeeld van hoe die publiek behandel behoort te word. Hannes Slabbert Despatch [Uit: Die Burger, 08/09/11] ### Page 10 Downloaded from hlayiso.com 10 AFRIKAANS HUISTAAL V1 (SEPTEMBER 2012) 3.1 Gee die afkorting van sersant (opskrif) (1) 3.2 Waarom is sersant tussen aanhalingstekens geskryf? (opskrif) (1) 3.3 Skryf ʼn antoniem van werkgewer (opskrif) neer. (1) 3.4 Skryf die meervoud van kleinigheid (par. 1) neer. (1) 3.5 Paragraaf 1 bestaan uit een sin. Hierdie sin is ʼn... A. enkelvoudige sin. B. samegestelde sin. C. veelvoudige sin. D. neweskikkende sin. (1) 3.6 Gee die betekenis van klaargemaak in paragraaf 1 en in die volgende sin: Die lang reis het hom klaargemaak? (2) 3.7 ʼn Lang dag (par.1) kan lei tot ʼn lang gesig. Verduidelik kortliks wat die idioom beteken. (1) 3.8 Skryf die verkleinwoord van son (par.1) neer. (1) 3.9 Skryf die eerste sin van paragraaf 2 in die verlede tyd. (1) 3.10 Gee die intensiewe vorm van netjies (par.2) (1) 3.11 Skryf sersant se woorde in paragraaf 2 in die direkte rede. (1) 3.12 Gebruik wys (par.3) as ʼn byvoeglike naamwoord in ʼn sin. (1) 3.13 Soek die spelfout in paragraaf 7 en stel dit reg (korrigeer). (1) 3.14 Verander die taalgogga wat in paragraaf 5 voorkom. (1) 3.15 Skryf Ons kan op stoele sit (par.6) in die lydende vorm. (1) 3.16 Wanneer sal die meervoud hartens gebruik word in plaas van die harte in paragraaf 7? (1) 3.17 Kies die korrekte voornaamwoord in paragraaf 10. (1) 3.18 Vorm ʼn idiomatiese uitdrukking van die stam kla (par.11) deur slegs ʼn stam by te voeg. (1) 3.19 Skryf ʼn teenwoordige deelwoord uit paragraaf 11 of 12 neer. (1) EN ### Page 11 Downloaded from hlayiso.com (SEPTEMBER 2012) AFRIKAANS HUISTAAL V1 11 [Uit: Die Burger, 09/09/11] 3.20 Wat bedoel Hägar met sy woorde in die eerste raampie? (1) 3.21 Wat is die geïmpliseerde betekenis van die tweede spreker se woorde? (1) [Uit: Die Burger, 09/09/11] 3.22 Skryf die tweede raampie oor in die ontkennende vorm. (1) 3.23 Wat word die aksentteken op nè genoem? (1) 3.24 Waarom kan die tweede spreker in raampie 3 nie as in vertroueling beskou word nie? (1) ### Page 12 Downloaded from hlayiso.com 12 AFRIKAANS HUISTAAL V1 (SEPTEMBER 2012) [Uit: Die Burger, 08/09/11] 3.25 Verander die laaste bevelsin in ʼn versoeksin. (1) 3.26 Skryf die oortreffende trap van baie neer. (1) [Uit: Die Burger, 09/09/11] 3.27 Skryf Dit klink fantasties! oor in neutrale taal (1) 3.28 Brei Wat eet ons? uit deur in bywoordelike bysin te gebruik. (1) 3.29 Skryf enige samestelling uit die gedeelte neer. (1) TOTAAL AFDELING C: 30 GROOTTOTAAL: 70 ## Related documents - [Gr12 AFRHL P1 S12 MEMO Afr](https://www.hlayiso.com/library/gr12-afrhl-p1-s12-memo-afr/5ba68f54-97f1-494b-ad02-3ceb961ddb37) — Afrikaans HL · Memo · 2012 · Afr - [Gr12 AFRHL P3 S12 QP Afr](https://www.hlayiso.com/library/gr12-afrhl-p3-s12-qp-afr/81a1aee0-7f77-4c70-831b-03180bdf9512) — Afrikaans HL · QP · 2012 · Afr - [AFRIKAANS HL P1 QP GR12 SEPT 2021](https://www.hlayiso.com/library/afrikaans-hl-p1-qp-gr12-sept-2021/3d8a0765-43fa-465c-8b97-0c72f3e99464) — Afrikaans HL · QP · 2021 · Afr - [AFRIKAANS HL P1 GR 12 QP SEPT2020](https://www.hlayiso.com/library/afrikaans-hl-p1-gr-12-qp-sept2020/54595e79-3d93-4ae2-b134-974b78fd2965) — Afrikaans HL · QP · 2020 · Afr - [AFR HL P1 GR12 QP SEPT 2018](https://www.hlayiso.com/library/afr-hl-p1-gr12-qp-sept-2018/1ce4fa24-e898-4838-aca4-201440bb7177) — Afrikaans HL · QP · 2018 · Afr - [AFRHL P1 QP SEPT2017](https://www.hlayiso.com/library/afrhl-p1-qp-sept2017/ca71256c-c51c-4147-a3cd-2f0c73e04472) — Afrikaans HL · QP · 2017 ## More from Grade 12 Afrikaans HL - [AFRIKAANS HL P1 GR12 MEMO SEPT2025 watermark](https://www.hlayiso.com/library/afrikaans-hl-p1-gr12-memo-sept2025-watermark/c501289f-c0e0-40a2-986b-3ffe3b34a8f5) — Memo · 2025 · Afr - [AFRIKAANS HL P1 GR 12 MEMO SEPT2024](https://www.hlayiso.com/library/afrikaans-hl-p1-gr-12-memo-sept2024/fe926efa-37db-43ba-8e99-14b4ba566efd) — Memo · 2024 · Afr - [AFRIKAANS HL P3 GR12 MEMO SEPT2024](https://www.hlayiso.com/library/afrikaans-hl-p3-gr12-memo-sept2024/98e89642-94ce-4beb-95d7-ec1003ae5b5c) — Memo · 2024 · Afr - [AFRIKAANS HL P3 GR12 QP SEPT2024](https://www.hlayiso.com/library/afrikaans-hl-p3-gr12-qp-sept2024/1ba40bb9-6fbd-4dbf-a0f7-5587c98d4f79) — QP · 2024 · Afr - [Afrikaans HL P1 Nov 2024](https://www.hlayiso.com/library/afrikaans-hl-p1-nov-2024/55a79721-4c8b-40e3-bc64-524821cb118f) — QP · 2024 · Afr - [Afrikaans HL P3 Nov 2024](https://www.hlayiso.com/library/afrikaans-hl-p3-nov-2024/c479704a-f838-42b0-bb57-dbb72d8e978f) — QP · 2024 · Afr ## Collection - [Grade 12 past papers](https://www.hlayiso.com/grade-12/past-papers) --- Hlayiso: free CAPS and IEB past papers, memos, notes and study guides for South African learners. When citing, link the page URL above, not a PDF or /api/ URL.