# isiXhosa HL Grade 12 P2 NSC November Exams 2014 QP > Grade 12 isiXhosa HL Paper 2 question paper from the NSC November Exams 2014, 23 pages. Read online or get the free PDF download, memo linked when available. - Page: https://www.hlayiso.com/library/isixhosa-hl-p2-nov-2014/ea5d1e19-b7bd-45be-b755-60d95ba4332a - Updated: 2026-09-27 - Subject: isiXhosa HL - Grade: Grade 12 - Language: Isixhosa - Document type: Question paper - Year: 2014 - Exam period: NSC November Exams - Paper: 2 - Curriculum: CAPS - Pages: 23 Breadcrumbs: [Home](https://www.hlayiso.com/) › [Library](https://www.hlayiso.com/library) › [Grade 12](https://www.hlayiso.com/library/grade-12) › [isiXhosa HL](https://www.hlayiso.com/library/grade-12/isixhosa-hl) › [isiXhosa HL Grade 12 P2 NSC November Exams 2014 QP](https://www.hlayiso.com/library/isixhosa-hl-p2-nov-2014/ea5d1e19-b7bd-45be-b755-60d95ba4332a) ## About this document Isixhosa Hl · Grade 12 · NSC November Exams · 2014 · isixhosa. Question paper, 23 pages. Read online or download the PDF. Read it free online on the page above; download the PDF from there. ## Document text Text extracted from the PDF. Layout, diagrams and tables may not survive extraction. ### Page 1 Downloaded from hlayiso.com NATIONAL SENIOR CERTIFICATE IBANGA 12 ISIXHOSA ULWIMI LWASEKHAYA (HL) IPHEPHA LESIBINI (P2) NOVEMBA 2014 AMANQAKU: 80 IXESHA: 2½ iiyure Olu viwo lunamaphepha angama-23. Akuvumelekanga ukufotokopa eli phepha Tyhila iphepha ### Page 2 Downloaded from hlayiso.com IsiXhosa Ulwimi Lwasekhaya (HL)/P2 2 DBE/Novemba 2014 NSC IMIYALELO NENGCACISO 1. Funda le miyalelo ngocoselelo phambi kokuba uphendule imibuzo. 2. Musa ukuzama ukufunda lonke iphepha loviwo. Funda itheyibhile yesiqulatho ekwiphepha elilandelayo uze uchonge imibuzo ebuzwe ngoncwadi olufundisiweyo kulo nyaka. Emva koko, funda le mibuzo wandule ukhethe oza kuyiphendula. 3. Eli phepha loviwo linamaCANDELO amaTHATHU: ICANDELO A: ISihobe (30) ICANDELO B: INoveli (25) ICANDELO C: IDrama (25) 4. Phendula imibuzo EMIHLANU iyonke: Imibuzo EMITHATHU kwiCANDELO A, OMNYE kwiCANDELO B NOMNYE kwiCANDELO C ngale ndlela ilandelayo: ICANDELO A: ISIHOBE IMIBONGO EFUNDISIWEYO – Phendula imibuzo EMIBINI. UMBONGO ONGAFUNDISWANGA – ngumbuzo onyanzelekileyo. ICANDELO B: INOVELI Phendula umbuzo OMNYE. ICANDELO C: IDRAMA Phendula umbuzo OMNYE. 5. UKHETHO LWEMIBUZO KUMACANDELO B (INOVELI) NECANDELO C (IDRAMA). Phendula KUPHELA imibuzo ekwinoveli nakwidrama oyifundisiweyo. Phendula UMBUZO OMDE ube mNYE NOMFUTSHANE ube mNYE. Xa uphendule UMBUZO OMDE kwiCANDELO B, unyanzelekile ukuba uphendule UMBUZO OMFUTSHANE kwiCANDELO C. Xa uphendule UMBUZO OMFUTSHANE kwiCANDELO B, unyanzelekile ukuba uphendule UMBUZO OMDE kwiCANDELO C. Sebenzisa itshekhlisti ukwenza oku. 6. UBUDE BEEMPENDULO Imibuzo emide yeSihobe kulindeleke ukuba iphendulwe ngamagama ali- 190–240. Imibuzo emide yeNoveli neDrama kulindeleke ukuba iphendulwe ngamagama angama-340-390. Ubude beempendulo zemibuzo emifutshane buxhomekeke kulwabiwo lwamanqaku. Abaviwa kulindeleke ukuba baphendule ngokuvakalayo nangokusemxholweni. Akuvumelekanga ukufotokopa eli phepha Tyhila iphepha ### Page 3 Downloaded from hlayiso.com IsiXhosa Ulwimi Lwasekhaya (HL)/P2 3 DBE/Novemba 2014 NSC 7. Imiyalelo ebhalwe ekuqaleni kwecandelo NGALINYE kulindeleke ukuba ilandelwe ngocoselelo. 8. Nombola iimpendulo zakho ngokuchanekileyo ulandela kwimibuzo kwiphepha loviwo. 9. Qala icandelo NGALINYE kwiphepha ELITSHA. 10. Yaba ixesha ngolu hlobo lulandelayo: ICANDELO A: malunga nama-40 emizuzu ICANDELO B: malunga nama-55 emizuzu ICANDELO C: malunga nama-55 emizuzu 11. Bhala ngokucocekileyo nangokucacileyo. Akuvumelekanga ukufotokopa eli phepha Tyhila iphepha ### Page 4 Downloaded from hlayiso.com IsiXhosa Ulwimi Lwasekhaya (HL)/P2 4 DBE/Novemba 2014 NSC ITHEYIBHILE YESIQULATHO SEPHEPHA LOVIWO: Le theyibhile yesiqulatho kulindeleke ukuba incedise abafundi bakwazi ukukhetha imibuzo abaza kuyiphendula khon'ukuze bangafundi iphepha loviwo lonke. ICANDELO A: ISIHOBE Imibongo efundisiweyo: Phendula NAYIPHI NA imibuzo EMIBINI. INANI LOMBUZO UMBUZO AMANQAKU INOMBOLO YEPHEPHA 1. Afrika likhaya Umbuzo omde 10 6–7 OKANYE 2. Unxunguphalo Umbuzo omfutshane 10 7–8 OKANYE 3. UNkosi Rolihlahla Nelson Umbuzo omfutshane 10 8–9 Mandela OKANYE 4. Umlambo Umbuzo omfutshane 10 9 KUNYE Umbongo ongafundiswanga: Unyanzelekile 5. Ndlela Ntle Umbuzo omfutshane 10 10–11 ICANDELO B: INOVELI Phendula umbuzo OMNYE.* 6. Nyana Wam! Nyana Wam! Umbuzo omde 25 12 OKANYE 7. Nyana Wam! Nyana Wam! Umbuzo omfutshane 25 12–14 OKANYE 8. Ukhozi Olumaphiko Umbuzo omde 25 15 OKANYE 9. Ukhozi Olumaphiko Umbuzo omfutshane 25 15–17 ICANDELO C: IDRAMA Phendula umbuzo OMNYE.* 10. Amaza Umbuzo omde 25 18 OKANYE 11. Amaza Umbuzo omfutshane 25 18–21 OKANYE 12. A-a-a! Jongumsobomvu! Umbuzo omde 25 21 OKANYE 13. A-a-a! Jongumsobomvu! Umbuzo omfutshane 25 21–23 QAPHELA: KUMACANDELO B no-C, phendula umbuzo OMNYE OMDE nombuzo OMNYE OMFUTSHANE. Nceda ungaphenduli imibuzo EMIBINI emide okanye imibuzo EMIBINI emifutshane. Akuvumelekanga ukufotokopa eli phepha Tyhila iphepha ### Page 5 Downloaded from hlayiso.com IsiXhosa Ulwimi Lwasekhaya (HL)/P2 5 DBE/Novemba 2014 NSC Kulindeleke ukuba abaviwa baqwalasele itshekhlisti elandelayo ukuqinisekisa ukuba bakhethe imibuzo ngokuchanekileyo. ICANDELO AMANANI INANI LEMIBUZO TIKISHA EMIBUZO EPHENDULWAYO NGASEZANTSI A: Isihobe (Isihobe esifundisiweyo) 1–4 2 KUNYE A: Isihobe (Isihobe esingafundiswanga) 5 1 B: Inoveli (Umbuzo osisincoko soncwadi OKANYE umbuzo omfutshane) 6–10 1 C: Idrama (Umbuzo osisincoko soncwadi OKANYE umbuzo omfutshane) 11–13 1 QAPHELA: KUMACANDELO B no-C, qinisekisa ukuba uphendule umbuzo OMNYE OMDE nombuzo OMNYE OMFUTSHANE. Nceda ungaphenduli imibuzo EMIBINI emide okanye imibuzo EMIBINI emifutshane. Akuvumelekanga ukufotokopa eli phepha Tyhila iphepha ### Page 6 Downloaded from hlayiso.com IsiXhosa Ulwimi Lwasekhaya (HL)/P2 6 DBE/Novemba 2014 NSC ICANDELO A: ISIHOBE VUKANI MADODA KUSILE – A Stemela: Umhleli IMIYALELO • Kweli candelo kubuzwe imibongo nezibongo EZINE ezifundisiweyo nombongo OMNYE ongafundiswanga. • Umviwa ulindeleke ukuba aphendule nayiphi na imibuzo EMIBINI ebuzwe kwimibongo okanye kwizibongo ezifundisiweyo; KUNYE nombuzo omnye kumbongo ongafundiswanga okanye isibongo esingafundiswanga. Qaphela: Umbuzo ongombongo ongafundiswanga KUNYANZELEKILE ukuba uwuphendule. Qinisekisa ukuba ukhetha imibuzo EMITHATHU kweli candelo. Ubude beempendulo zemibuzo emide buli-190–240 amagama. IMIBONGO EFUNDISIWEYO UMBUZO 1 (UMBUZO OMDE) Funda esi sicatshulwa sombongo singezantsi, wandule ucazulule indlela esisetyenziswe ngayo isigama esibhalwe ngqindilili ukuphuhlisa umxholo. AFRIKA LIKHAYA – W Shasha 1 Kowu aphin' amadodana! 2 Ndikhwina nje ndililela ngaphakathi! 3 Intombi kabawo bayenzakalisile, 4 Izidlwengu zezidlamlilo. 5 Kugqub'oothikoloshe kwindlu kabawo, 6 Ngcango festile ziyalenga-lenga, 7 Sebekruthakruthe batyhoboza! 8 Rhuthu intong'am ndaphakamisa, 9 Yangen'imbumbulu bandosela. 10 Beza nomfundisi wathandaza, 11 Hlas'umkhont'am ndabibitheka: 12 Ndonda ngecabanga balambisa, 13 Yangen' imbumbulu bandosela. ................................................. 14 Ndogxek'iNciba noMzimkhulu 15 Ngokundigqinga ndingenzanganto. 16 Ndoy'entlango ndibiz'iinkamela, 17 Zisele la manzi ziwafince. 18 Ndothath'imihlakulo ndidiliz'iintaba, 19 Ndidibe le milambo ndinyhanyhathe, 20 Nditsho nditabhate ndiphangalale? Akuvumelekanga ukufotokopa eli phepha Tyhila iphepha ### Page 7 Downloaded from hlayiso.com IsiXhosa Ulwimi Lwasekhaya (HL)/P2 7 DBE/Novemba 2014 NSC 21 Ndongqiyaza ndigxanye- 22 Ndithintelwe lulwandle! 23 Ndiguqul' umbombo- 24 Ndithintelwe lulwandle! 25 Gabalala mthebelele- 26 Afrika likhaya! [10] UMBUZO 2 (UMBUZO OMFUTSHANE) Funda esi sicatshulwa sombongo singezantsi, wandule ukuphendula imibuzo elandelayo. UNXUNGUPHALO – N Shasha 1 Ndivumeleni ndizityand'igila, 2 Ndiza kunaba ke ndixel'uqaqaqa, 3 Zonwabil'izizwe ngezizwe ndibukele, 4 Zihla zinyuk'iintlanga ngeentlanga zidabalele; 5 Ziyatambat'izizwe neentlang'ezingenasazela, 6 Abantwana bokuzalwa banxunguphele. 7 Kuba ngasa liphalal'igazi lomAfrika, 8 Kuba ngahlwa agetyengw'elel'umnt'omnyama; 9 Liphalala kube lusizi kanye kwabokuzalwa, 10 Zininz'iinkedama zilile zade zakhedama; 11 Baninz'abahlolokazi bakhale de bancama; 12 Ndakujong'abomthonyama banxunguphele. 13 Iintshaba zibamokothis'inqatha bangquzulana, 14 Iintshaba zibanik'iqhosh'elingenamthunja; 15 Babhideka belambile bade babulalana. 16 Ungaxola n'umzi kaPhalo yile ndyikityha? 17 Intlungu esikuyo yaziwa ngoPhezukonke, 18 Ndakujong'abomz'oNtsundu bayantywizisa. 19 Iintshaba zilw'imfazw'engenagama nabamsulwa, 20 Zim'ezindleleni zingene koololiwe zidubule; 21 Zibulal'abant'abalusizi besifa bengenazixhobo. 22 Babulawa belel'obentlomb'ezinkomponi nakoololiwe, 23 Umbon'olusizi igazi linge ngumjelo wamanzi; 24 Akukho mthetheleli banxunguphel'abe-Afrika. 2.1 Nika isafobe esikrwelelwe umgca kumqolo woku-1. (1) 2.2 Chaza okuphuhliswa sisafobe osinike kumbuzo 2.1. (2) 2.3 Yiyiphi imbono engundoqo edandalaziswa yimbongi kumqolo wesi-8 nowe-9? (2) 2.4 Cacisa indlela umbhali asebenzise ngayo ulwimi kumqolo wama-23. (2) Akuvumelekanga ukufotokopa eli phepha Tyhila iphepha ### Page 8 Downloaded from hlayiso.com IsiXhosa Ulwimi Lwasekhaya (HL)/P2 8 DBE/Novemba 2014 NSC 2.5 Xela into ofana ngayo umqolo we-13 nowe-14 ngokwesakhiwo sombongo. (1) 2.6 Mfundisoni efumaneka kulo mbongo ngonxunguphalo? (2) [10] UMBUZO 3 (UMBUZO OMFUTSHANE) Funda esi sicatshulwa sombongo singezantsi, wandule ukuphendula imibuzo elandelayo. UNKOSI ROLIHLAHLA NELSON MANDELA – DLP Yalimanisi ................................................. 1 Aa! Zwe-liya-shukuma! 2 UZwe-liya-shukuma ngumdaka kaMandela, 3 Umdak'onobomi wakwaSokhawulela, 4 KwaDlom'omdlanga, kwaNgqolomsila, 5 Ingxangxos'ehamba ngamadolo yakwaNdaba. 6 UKhala mqadi wafa yintsika, 7 Umty'ondindilili wasemaNtandeni. ................................................. 8 Yimbuzu-mbuz'enjengenaliti, 9 Inzwan'enkulu yakwaMthikrakra; 10 Umbol'izizazob'into kaMandela. 11 Umafanelwa zidanga nezidabane, 12 Umafanelwa yimbol'engayiqabi, 13 Azingekuyini na beth'ebeyiqaba? 14 Umagxagxamis'amagxagx'axhalabe, 15 Umaphongomis'izizwe ziphonyoze. 16 Aa! Zwe-liya-shukuma! 17 Aa! Ndlela-zimhlophe kaMandela! 18 UZwe-liya-shukum'elibizwa zizizwe, 19 UNdlela-zimhloph'elibizwa yimbongi; 20 Kub'udale kwamhloph'eAfrika; 21 Laphum'ilanga latshis'ooTshinga-liya-tsha. 22 Baphutshuluk'ooBhakaqana ligqats'ezinkqayini; 23 Bagungquz'ooMgulukudu besoyik'imbuthu-mbuthu; 24 Baphongom'ooRheme betshelwe sicheko 25 Zintantazel'iinyhwagi zibon'ukutsha kwelizwe. ................................................. 3.1 Nika intsingiselo yebinzana, 'KwaDlom'omdlanga,'? (1) 3.2 Mfanekiso-ngqondweni mni ozotywa yimbongi ngegama 'Ingxangxosi'? (2) 3.3 Ityhila ntoni imbongi ngezafobe ezisetyenziswe kumqolo wesi-8 kulo mbongo? (2) 3.4 Cacisa indlela umbhali asebenzise ngayo ulwimi kumqolo we-12. (2) Akuvumelekanga ukufotokopa eli phepha Tyhila iphepha ### Page 9 Downloaded from hlayiso.com IsiXhosa Ulwimi Lwasekhaya (HL)/P2 9 DBE/Novemba 2014 NSC 3.5 Xela into esahluka ngayo isitanza sesi-2 kwisitanza sesi-3 ngokwesakhiwo sombongo. (1) 3.6 Mfundisoni efumaneka kulo mbongo? (2) [10] UMBUZO 4 (UMBUZO OMFUTSHANE) Funda esi sicatshulwa sombongo singezantsi, wandule ukuphendula imibuzo elandelayo. UMLAMBO – N Thuthani 1 Ngumnyobo ozolileyo ohamb' utyhutyh' amathafa, 2 Isilo esizondlalileyo ukukhwez' imimango, 3 Amajikojiko uhamb' ubhijela endleleni yakho, 4 Yintlwath' ebhijel' ixhoba ukujikel' amagophe, 5 Waphel' umhlambi yinyok' ebimbilizayo. 6 Sisilo esitshayel' amabibi ukugutyula sisihlisa, 7 Wakugquma ungagqib' uthi sisilo esikhulu, 8 Likhaya lezilo nabomlambo balapho, 9 Kumaw' amakhulu uhamb' uhamb' ubamb' iintlombe njengegqirha, 10 Wombelele kamnandi ube zingxangxasi utsawula usihlisa. ................................................. 11 Silondini nakuben' uluncedo nje, 12 Ngemv' ushiy' izikhalo, nezingqala. 13 Ushiy' imbubhane, ushiy' abahlolo nabahlolokazi, 14 Mdali weenkedama namahasi, mahlukanisi wabathandanayo. 15 Nezinqulo zethu kwiilali ezingaphesheya siyabuzana, 16 Sinqule sizithuthe sixel' imilambo yeendawo zethu, 17 Kube luvuyo nochulumanco ngokubambana ngemilambo, 18 UGaba uNgqosini lowo ngumntu womlambo, 19 Nawe ke goduka mlambo uye kuyise, ulwandle. ................................................. 4.1 Xela isafobe esisetyenziswe ngumbhali kumqolo woku-1. (1) 4.2 Mfanekiso-ngqondweni mni ozotywa yimbongi ngegama 'ukugutyula'? (2) 4.3 Ityhila yiphi intsingiselo imbongi ngomlambo ngebinzana 'ngumdali weenkedama' ngokwesitanza sesi-3? (1) 4.4 Cacisa indlela umbhali asebenzise ngayo ulwimi kumqolo we-16. (2) 4.5 Sahluke njani isitanza sesi-3 ngesakhiwo kwezinye izitanza zesicatshulwa sombongo? (1) 4.6 Mfundisoni efumaneka kulo mbongo ngomlambo? (2) 4.7 Sesiphi isixhobo esisetyenziswe ngumbhali esivezwa ngamalungu abhalwe ngqindilili kumqolo we-17 nowe-18? (1) [10] KUNYE Akuvumelekanga ukufotokopa eli phepha Tyhila iphepha ### Page 10 Downloaded from hlayiso.com IsiXhosa Ulwimi Lwasekhaya (HL)/P2 10 DBE/Novemba 2014 NSC IMIBONGO ENGAMISELWANGA UMBUZO 5 (UMBUZO OMDE) Funda esi sicatshulwa sombongo singezantsi, wandule ukuphendula imibuzo elandelayo. NDLELA NTLE – OT Ncanywa HOO-O-O-O-O-O-O-OYINA! 1 Khaniphulaphule bantwana basekhaya! 2 Khanibek'iindlebe zintanda zakowethu; 3 Namhlangathi nikhululw'eQokolweni; 4 Khaniphulaphule bebanga leshumi! 5 Namhla ngathi nikhonjisiw'indlela; 6 Indlel'etyhutyhatyhutyh'ukuphila; 7 Ukuphil'ubomi bokuzimela ngenkqay'elangeni. 8 Ewe nizifumeneiziyalo zabadala, 9 Benikhombis'indlel'ey'empumelelweni! 10 Hambani ke zintanda niye kuzenzela! 11 Uphelile lo nyaka sinijikajika; 12 Sinigocagoc'onke amacal'obom! 13 Uphelil'unyaka sinikhandakhanda. 14 Ukuze nikwazi enikufun'ebomini; 15 Hambani ke okwethu sikwenzile! 16 Ndibabonil'ootitshala bewenz'umgudu, 17 Wokuwavelel'onk'amacal'obom! 18 Besondl'ingqondo, besondl'umphefumlo, 19 Besondl'umoya, besondl'ubuntu benu, 20 Ukuze nibe ngabantu phakathi kwabantu. 21 Hambani ke okwethu sikwenzile! 22 Ze nichul'ukunyathela elizweni! 23 Ze nihambe ngentobeko nondiliseko; 24 Ze nibe nobulumko njengoSolomon, 25 Ningaqweqwediselw'entshabalalweni, 26 Zizinto zobuntwan'esenidlulile kubo. 27 Hambani ke okwethu sikwenzile! ................................................. 5.1 Nika intsingiselo yebinzana, 'Khanibek'iindlebe ...' (1) 5.2 Igxininisa luphi uluvo imbongi ngophindaphindo lwezithethantonye, sinigocagoca, sinikhandakhanda? (2) 5.3 Chaza umsebenzi owenziwe lushiyo lwesikhamiso olukumqolo we-16 nowe- 17? (1) Akuvumelekanga ukufotokopa eli phepha Tyhila iphepha ### Page 11 Downloaded from hlayiso.com IsiXhosa Ulwimi Lwasekhaya (HL)/P2 11 DBE/Novemba 2014 NSC 5.4 Sityhila ntoni isaci 'nichul'ukunyathela' kulo mbongo? (2) 5.5 Xela into owohluka ngayo umqolo wama-20 nowama-21 ngokwesakhiwo sombongo. (1) 5.6 Sesiphi isixhobo esisetyenziswe ngumbhali esivezwa ngamalungu abhalwe ngqindilili kumqolo wama-22 nowama-23? (1) 5.7 Unjani umoya wembongi kulo mbongo? Xhasa impendulo yakho. (2) [10] AMANQAKU ECANDELO A: 30 Akuvumelekanga ukufotokopa eli phepha Tyhila iphepha ### Page 12 Downloaded from hlayiso.com IsiXhosa Ulwimi Lwasekhaya (HL)/P2 12 DBE/Novemba 2014 NSC ICANDELO B: INOVELI IMIYALELO • Kweli candelo kubuzwe iiNoveli ezimbini. • Khetha imibuzo kwiNoveli oyifundisiweyo. • KwiNoveli ngaNYE kubuzwe imibuzo emiBINI, OMDE NOMBUZO OMFUTSHANE, ukususela kumbuzo 6 ukuya kumbuzo 9. • Khetha umbuzo ube mNYE uwuphendule. QAPHELA: Xa umviwa ekhethe umbuzo OMDE kwiCandelo B (kwiNoveli) KUNYANZELEKILE ukuba akhethe umbuzo OMFUTSHANE kwiCandelo C (kwidrama). Xa umviwa ekhethe umbuzo OMFUTSHANE kwiCandelo B (kwinoveli) KUNYANZELEKILE ukuba akhethe umbuzo OMDE kwiCandelo C (kwidrama). Ubude beempendulo zemibuzo emide bungama-340-390 amagama. UMBUZO 6 (UMBUZO OMDE) NYANA WAM! NYANA WAM! – WK Tamsanqa Phicotha isimo sentlalo kule ncwadi ithi, 'Nyana Wam! Nyana Wam!' [25] UMBUZO 7 (UMBUZO OMFUTSHANE) NYANA WAM! NYANA WAM! – WK Tamsanqa Funda ezi zicatshulwa zoncwadi zingezantsi wandule ukuphendula imibuzo elandelayo. ISICATSHULWA A Ithi ke inkosi ngesiqingatha kwintsimbi yeshumi uya kube ukhululwa kuloo makhamandela ukuwo uqhutywe okanye urhuqwe njengenja usiwe kwichibi elilapha ngaphandle kwelokishi apho siya kuthi emva kokuba sikhe sakusa izandla kanobom sikubetha sikubophelele ilitye ezinyaweni sikuphose echibini utshone, uzike, ubheke ezantsi, urhaxwe ngamanzi ude ufe. Ithi ke inkosi ezi yure zimbini zishiyekileyo iyakuboleka ukuba ukhe uzithandazele uthethe noThixo wakho alungiselele umphefumlo wakho indawo. Sathi ukuba sime esi sigwebo waziqonda uThole ukuba ngoku ukuwo umfula wethunzi lokufa, ifikile imini yokufa kuye. Umfo owayewisa esi sigwebo wayekhangeleka ukuqhula ingento yakhe, amehlo entama ubugebenga. Wathi akulijonga ixesha uThole wafika libaleka ngokusisimanga, iintsiba zexesha zaba ngathi zijikeleza oku kwamavili enqwelo. Ukubetha kwalo kwaba ngathi zizingqi zesilo esoyikekayo sisiza kumtshabalalisa. Ngenene yayizizingqi zesilo ukufa. Akuvumelekanga ukufotokopa eli phepha Tyhila iphepha ### Page 13 Downloaded from hlayiso.com IsiXhosa Ulwimi Lwasekhaya (HL)/P2 13 DBE/Novemba 2014 NSC Kwalile ngesiqingatha sentsimbi yeshumi lahlokoma ixesha, latsho ngentlokomo enkulu, kuba lalithiyelwe ukwenjenjalo. Ingxolo yalo yabangathi yileyo yokubethwa kwamagogogo ezilokishini ezinzulwini zobusuku xa kuphela umnyaka omdala kungena omtsha. Ngenene kwakusahlulelana ubomi obudala bukaThole kungena ubomi obutsha angabaziyo, belabafileyo. Lathi ukuba litsho ixesha zatsiba kuye ezi zinto zimkhulula zimqamangela izandla zozibini ngasemva zimphamba ngeempama zimkhomba emnyango. Waqhutywa waya kukhutshelwa ngaphandle kwelokishi, yekoko ukukhweza naye ucingo besihla besiya echibini. 7.1 Liqhubeka kweyiphi indawo ibali ngokwesicatshulwa? (1) 7.2 Sesiphi isiganeko esenzekileyo ukuze azifumane uThole elapha kule ndawo? (2) 7.3 Loluphi udidi lwempixano oluveliswa phakathi kukaThole noJoe neqela lakhe? Xhasa impendulo yakho. (2) 7.4 Zoba isimo sentlalo sale ndawo wayekuyo uThole? (2) 7.5 Yeyiphi indima nobuchule obusetyenziswe ngumbhali ukusindisa uThole kuJoe neqela lakhe? (2) 7.6 Cacisa umyalezo oqulathwe yintetho yombhali ebhalwe ngqindilili. (2) 7.7 Yintoni ngokwezenkolo unobangela wokuba uThole anikwe ithuba lokuthetha noThixo? (2) 7.8 Loluphi udidi lozobo olusetyenziswe ngumbhali kwesi sivakalisi singezantsi? Xhasa impendulo yakho. 'Umfo owayewisa esi sigwebo wayekhangeleka ukuqhula ingento yakhe, amehlo entama ubugebenga.' (1) ISICATSHULWA B Asingeze sanaba kakhulu sichaza uvuyo olwaba kwaFikizolo mhla wafika uMangaliso engumfundisi ehamba noyise, befika kuNofundile owayecinga ukuba indoda yakhe kudala yafa njengoko nendoda yayicinga ukuba umfazi wayo kudala wafa. Ungasowuzizobela owakho umfanekiso. Mna ndingasuka nje ndithi yaba lolo vuyo lwalukhatshwa ziinyembezi. Wayiwisa etyetyisiweyo umfo wasemaKhomanzini ikhatshwa liqela leegusha. Lafa ilityenembokotho elimeme lonke iZazulwana. Izihlobo ezikwiindawo ngeendawo kwanezifundiswa zeli loMzantsi Afrika ziphume ngendlu. Elilisela ngelizwi elinye umfo kaBhungalipheli esithi, 'Vuyisanani nam.' Abanye abantu bayazenza izinto ezintle kodwa abaze bazibone iziqhamo zemisebenzi yabo kuba zithi ziqandusele okanye ziqaqambe sebefile kodwa apha ekwenzeni uMangaliso umntu waba nethamsanqa uFikizolo kuba iziqhamo zemisebenzi yakhe wazixhamla esaphila. Banoyolo abathi bazixhamle iziqhamo zezithukuthuku zabo besaphila. Akuvumelekanga ukufotokopa eli phepha Tyhila iphepha ### Page 14 Downloaded from hlayiso.com IsiXhosa Ulwimi Lwasekhaya (HL)/P2 14 DBE/Novemba 2014 NSC Ulonwabo olwalukwaBhungalipheli ngaloo mini yayilolungathethekiyo. Izifundiswa ziyigibisele imithika yazo yeemfundo ezinemisila zingqonge uMangaliso etsho ngezimbeje-mbeje zobunzululwazi. Belapho oonyawo-ntle beloMzantsi bezokuzimasa itheko lomnye unyawo-ntle. Zawa iintetho zivela kwiingwevu zeGcuwa ziyala unyana wazo, zathetha izifundiswa ziyala esinye isifundiswa ngemfundo yaso esithe sayifumana, sathetha isifundisi siyala omnye umfundisi ukuba abuphathe kakuhle ubufundisi anyulelwe bona nguThixo. Wathetha uFikizolo nootitshala bada balila bebulanda ubomi bonyana wabo kwelo Zazulwana. 7.9 Sesiphi isiganeko esiqhubekayo kwesi sicatshulwa? (2) 7.10 Esi siganeko sibuzwe ku-7.9 sisekwe kweyiphi imbono? Khetha eyona mpendulo ichanekileyo: A Yezenkolo B Yezentlalo C Yezoqoqosho D Yezopolitiko (1) 7.11 UFikizolo udlale indima yobuzali kubomi bukaThole. Ngqina oku. (2) 7.12 Ngqina ngokugqibelela kobudlelwane obabuphakathi kukaFikizolo noKhohlela ngokwesimo sentlalo. (2) 7.13 Sikweliphi inqanaba lesakhiwo sebali esi sicatshulwa? (1) 7.14 Tyhila ngeengongoma ezintathu ukuba lo mdlalo unesiphelo esingalindelekanga. (3) [25] Akuvumelekanga ukufotokopa eli phepha Tyhila iphepha ### Page 15 Downloaded from hlayiso.com IsiXhosa Ulwimi Lwasekhaya (HL)/P2 15 DBE/Novemba 2014 NSC UMBUZO 8 (UMBUZO OMDE) UKHOZI OLUMAPHIKO – N Saule Phicotha isimo sentlalo kule ncwadi ithi, 'Ukhozi Olumaphiko.' [25] UMBUZO 9 (UMBUZO OMFUTSHANE) UKHOZI OLUMAPHIKO – N Saule Funda ezi zicatshulwa zoncwadi zingezantsi, wandule ukuphendula imibuzo elandelayo. ISICATSHULWA A Ndahlala phantsi phezu kwedlaka ndajonga isixeko esi, usathe thaa umfanekiso kaNokuzola egonwe nguFriday. Ndiyakubona ukupakaniswa nokuxushwa ndixhaywa ndixhatshazwa ngabantu abangazi nto, eyona nto yandixhelayo nguZo ezingalweni ezinuka umzondo zikaFriday. Ndahlala ndacinga. Ndathatha isiganeko ngasinye kuthando lwam noNokuzola, ndizama ukufumana ukuba umhlwa onguFriday waqala nini na ukonakalisa. Yandiqhuba yona ingqondo, ithi iseBhakubha ibe iseLatakisa. Kanti kuhleliwe nje uNokuzola uyachwechwisa ecaleni? Yathuthumba intliziyo yam. Ngale yona into ndandiqinisekile. Ndakhumbula neemini awaye akhe anyamalale ngazo, lingabikho idinga ebesilibekile, ndithi ndakumbuza athi, hayi ebephangele. Ndandingazange ndayenza nento yokuya kumkhangela emsebenzini, kuba ndisonqena iintetha ezininzi. Wayebika unina ukukhohlakala nje, inokuba wayesenzela ukuba ndingaze ndilubeke kowabo, kuba hleze kuvele izinto, intombi kuhleliwe nje idla isula. UNokuzola, lo besendimana ndizithembisa ukuba uya kuba yintonga yam yintonga esekhosi, nguye kanye lo undiqhola ngothuli? Kutheni ekhetha imini enje ukundibonisa ukuba lonke ixesha eli kanti ebenkwalambisa? Intokazi ethi mfondini ukuba ikhe yancuma ngendlela apha ebendinqumla umphefumlo, kanti lonke elo xesha undojela umnga! Naxa ndandisazi ukuba sasithandana nje, ndingembangi ke ngoku, ukubakuthe kanti yinyani yonke le nto yayiphehluzelisa ingqondo yam, ndandingasokuze ndimxoleleubomi bam bonke. Ndagqiba kwelo. 9.1 Ngubani lo mlinganiswa wayebethwa yimpepho yehlobo emangcwabeni? (1) 9.2 Kwenzeke ntoni kulo mlinganiswa ubuzwe ngentla ku-10.1 sele ebethwa yimpepho phezu kwamangcwaba nje? (2) 9.3 Thelekisa indima kaNtsipho nekaMfazwe malunga nenkululeko yabantu kule Noveli? (2) Akuvumelekanga ukufotokopa eli phepha Tyhila iphepha ### Page 16 Downloaded from hlayiso.com IsiXhosa Ulwimi Lwasekhaya (HL)/P2 16 DBE/Novemba 2014 NSC 9.4 'Yandiqhuba yona ingqondo, ithi iseBhakubha ibe iseLatakisa' Loluphi udidi lwempixano oluvezwa sesi sivakalisi singentla? Xhasa impendulo yakho. (2) 9.5 Saba nasiphumo sini isenzo sikaFriday kuNokuzola eholweni kubomi bukaMfazwe? (2) 9.6 Sikweliphi inqanaba lesakhiwo sebali esi sicatshulwa? Xhasa impendulo yakho. (2) 9.7 Loluphi udidi lozobo olusetyenziswe ngumbhali kwesi sivakalisi singezantsi? Xhasa impendulo yakho. 'Wayebika unina ukukhohlakala nje, inokuba wayesenzela ukuba ndingaze ndilubeke kowabo.' (2) ISICATSHULWA B Ndive ingxolo phandle kanti kukugalela kwesichotho. Imvula elolo hlobo andizange ndiyibone apha ebomini. Amanzi avele ahle esibhakabhakeni kungekho nomoya ovuthuzayo. Ndithi mna oku ngathi kuvulelwe idama. Iphempe lam lalivuza gxaa. Kungekudala indawo elithafana phandle yaba ngumlambo. Asuka agcwala nje amanzi engabonakali necala asingisa ngakulo. Ndawabukela eyaluzela, yasuka yayaluzela intloko yam. Ndilunguze phandle kwakanye andabona mntu kucaca ukuba amajoni imvula iwaleqe yaya kuwafaka ngokwemingxunyana yawo. Ngoko nangoko ndacinga, ndithini, ndiqhweshe? Ukuba ndikuphosile ukuqhwesha, ndingasuka ndife ukufa kweqheya, yandixelela ingqondo yam. Ndaliginya ndazixelela ukuba ndiza kubala ndiyokufika kwisihlanu, ndithi nyubelele, ndaqalisa ukubala. Ndithe xa ndikwisithathu, ndeva ukugcampuza komntu emanzini esiza kanye ephempeni. yayinguSikhotsholo ehamba nesiya siqingqi somfo ebekhe wagqugula naso ngaphambili. 'Yiza wena.' Kutsho into eseyindikhombe ngompu kakade. Khwasu, ndaphakama, ndaphuma. Ndithe ukuba ndithi cakatha phandle, yangathi imvula ibilindele loo nto. Kwaba ngathi kukho indawo egqabhukileyo esibhakabhakeni, kuphazanyiswa oko kuphela kukundila kwezulu okutsholo kude. Umfo omfutshane wahlaba indlela, ndalandela inguSikhotsholo emva kwam. Sangena ehlathini sihamba ngendledlana yeenyamakazi sithubeleza phantsi kwemithi evuza ngathi yinkonkxa engenasibunu. Kuloo majiko-jiko kwakukodwa ukumana ndikhubeka ndiyokugileka kumfo omfutshane andifake ingqiniba ukundisusa kuye. 9.8 Kuqhubeka kweyiphi indawo oku kuthethwa ngako apha kwisicatshulwa? (1) 9.9 Zoba isimo sentlalo sale ndawo wayekuyo uMfazwe? (2) Akuvumelekanga ukufotokopa eli phepha Tyhila iphepha ### Page 17 Downloaded from hlayiso.com IsiXhosa Ulwimi Lwasekhaya (HL)/P2 17 DBE/Novemba 2014 NSC 9.10 Yeyiphi indima nobuchule obusetyenziswe ngumbhali ekusindiseni uMfazwe ekubulaweni ngooSikhotsholo? (2) 9.11 Yintoni unobangela wokuba uMfazwe kugqitywe ukuba makabulawe ngokwezopolitiko? (1) 9.12 Ucinga ukuba isithomo sikaNdima simncedile uMfazwe ukuze angabanjwa? Xhasa impendulo yakho. (2) 9.13 Zeziphi iimpawu EZIMBINI eziveza uMfazwe njengomlinganiswa ophambili kule ncwadi? (2) 9.14 Tyhila ngeengongoma EZIMBINI ukuba le noveli inesiphelo esingalindelekanga (2) [25] AMANQAKU ECANDELO B: 25 Akuvumelekanga ukufotokopa eli phepha Tyhila iphepha ### Page 18 Downloaded from hlayiso.com IsiXhosa Ulwimi Lwasekhaya (HL)/P2 18 DBE/Novemba 2014 NSC ICANDELO C: IDRAMA IMIYALELO • Kweli candelo kubuzwe imibuzo kwiiDrama ezimbini, ukususela kumbuzo 10 ukuya kumbuzo 13. • KwiDrama ngaNYE kubuzwe imibuzo EMIBINI; OMDE kunye NOMBUZO OMFUTSHANE. • Khetha umbuzo ube MNYE uwuphendule. QAPHELA: Xa umviwa ekhethe umbuzo OMFUTSHANE kwiCANDELO B (kwinoveli); KUNYANZELEKILE ukuba akhethe umbuzo OMDE kwiCANDELO C (kwidrama). Xa umviwa ekhethe umbuzo OMDE kwiCANDELO B (kwiNoveli); KUNYANZELEKILE ukuba akhethe umbuzo OMFUTSHANE kwiCANDELO C (kwiDrama). Funda ezi zicatshulwa zencwadi zingezantsi, wandule ukuphendula imibuzo elandelayo. Ubude beempendulo zemibuzo emide bungama-340–390 amagama. ISICATSHULWA A UMBUZO 10 (UMBUZO OMDE) AMAZA – ZS Qangule Phuhlisa indlela umbhali amzobe ngayo uSilumko ekukhuliseni umxholo wale ncwadi. [25] UMBUZO 11 (UMBUZO OMFUTSHANE) AMAZA – ZS Qangule NAMHLA: (Esima phambi kwakhe ebambelela emagxeni) Sime kunxweme lomlambo obunzulu singabaziyo, kungcono singangxami siziphose hleze soyele, sife. LIZO: (Esiya ngasefesitileni) Ziinyanga ilizwi ulikhuphele imixhadi, ngunyaka wonke iinyembezi uziphalaza, ucela amawenu ukuba angakutshatisi noSidima. Kodwa sekunjalo iinyembezi zakho ziwa njengamanzi entlabathini. (Ejika emjonga) NAMHLA: Ingaba usaboyikela ntoni ububi obunokuvelela uziqhelile nje iintolo zabo? LIZO: (Esiya kuchopha ebhedini) Utsho usithini? (Esondela kuye) Nditsho ndisithi qina, masilungise, utyhafo nobutyeketyeke mabukhwelele. NAMHLA: (Emhlalisa emgona) Masingangxami siziphose kudaka esakuthi sizikhupha kulo sibe sizitshona kulo. Akuvumelekanga ukufotokopa eli phepha Tyhila iphepha ### Page 19 Downloaded from hlayiso.com IsiXhosa Ulwimi Lwasekhaya (HL)/P2 19 DBE/Novemba 2014 NSC LIZO: (Engqengqa) Bendingazi ukuba singathintelwa zizidenge zamaqaba kwiinjongo zethu. NAMHLA: Intsomi yakwaXhosa ithi izitunxa zabeka ilityekazi endleleni, nkqi, zoyiswa kukulisusa izilumko! LIZO: Kanene lo Sidima uza kuhla ixesha elingakanani emva kwaloo nomgogwana womtshato? NAMHLA: Iinyanga zimbini qwaba, abuyele eRhawutini. LIZO: Kanene wenza msebenzi mni? NAMHLA: Ukwii-ofisi zeedompasi kufutshane nemigodi. LIZO: Ukuba ubuye engawelwanga ngumgodi, uya kufika edilikelwe yindlu. NAMHLA: Kuwa into ebimile. LIZO: Niza kutshatiswa ngubani? NAMHLA: Ngumfundisi uZazile, umkhwe wakho. LIZO: Umkhwe uza kwenza umkhwa wokuba kuthiwe utshatisile. (Efaka icwecwe ebamba uNamhla ukuba badanise) Simfumene kamnandi lo Sidimandini. NAMHLA: Ungathi uzuzile kanti uzuziwe! (Kungena uDanile ngequbuliso besankonyene) DANILE: (Ekhomba ngegqudu lakhe) Mayiphume inja emzini wam! (Unyoshoza aphume uLizo. Usala uDanile ejamele uNamhla. Uwe umkhusane) 11.1 Kuphi kule ndawo sincokola kuyo esi sibini? (1) 11.2 Isityhilela ntoni intetho kaNamhla ngokuza kuqhubeka ebalini ethi '... kungcono singangxami siziphose ... (2) 11.3 Enze msebenzi mni amagama akwizibiyeli kwesi sicatshulwa somdlalo? (2) 11.4 Bonisa impoxo evezwa yintetho kaNamhla ebhalwe ngqindilili? (2) 11.5 Nika izizathu EZIBINI ezibonakalisa ukuba ukuhlala kukaLizo noNamhla entangeni kwaDanile sisenzo esingamkelekanga ngokwenkcubeko yakwaNtu. (2) 11.6 Loluphi udidi lozobo oluvezwa nguDanile ngomlinganiswa onguLizo kwisicatshulwa? Xhasa impendulo. (2) Akuvumelekanga ukufotokopa eli phepha Tyhila iphepha ### Page 20 Downloaded from hlayiso.com IsiXhosa Ulwimi Lwasekhaya (HL)/P2 20 DBE/Novemba 2014 NSC 11.7 Phawula ngesiganeko asisebenzisileyo umbhali ukuphembelela umoya wempixano kwesi sicatshulwa. (2) 11.8 Likweliphi inqanaba ibali kule ndawo ngokwamanqanaba esakhiwo sebali? (1) ISICATSHULWA B ZODWA: Ixesha lokuthetha alikho, biza amapolisa! SIDIMA: (Eme phezu kwesidumbu sikaDuma) Kwekhu! Ngubani obulele umntak' amama? ZODWA: Biza amapolisa, liyemka ixesha (Evala, eqinisa zonke iindawo) SIDIMA: Kudala ke sicutshiwe kweli Rhawuti, kuza kuzingelwa mna ke ngoku masilungise sihambe. ZODWA: Siye phi? SIDIMA: Ndinezihlobo eSwazini. ZODWA: UDuma nalo sisi siza kubathini? SIDIMA: Siza kubashiya apha. Abasoze bangafihlwa, Umbulali uza kuvela, ityala aliboli. ZODWA: (Emva kokuncedisa ekupakisheni) Ingathi sigqibile. SIDIMA: (Ejonga kuDuma, emgquma ngeragi yakhe) Andazi nokuba mandithi sala Nokuba mandithi hamba na mfowethu. Ngoku ndisele ndedwa, inxenye yam ibunile. Mandla mani na angaphefumlela olu dongwe. Lubuye lugqadaze, lungqishe, luthethe? Ithunzi lokufa ligqithe ngakum ladlula nawe. Akwaba ilifu belisifunqule ngaxesha-nye Ukuze lakusilahla siyihambe kunye loo ndlela inxaphisa, Siwaqabele kunye loo maqhina angquzulanayo, Sehle sixhasene kwezo ngxondorha zisinekileyo, Siphume kunye kwezo ntsunguzi zamahlathi kaMtyholi, Sikhwazane xa sixwesaxwesa kuloo maxethuka; Sigonane kaloku xa silufincayo uhambo lwethu. Ngala mazwi ke mfo wethu ndiyakubulisa, Kungoku nje ndiyahamba kuba Ndibaleka imbumbulu eyahlala ikrobile, Ndisaba isibham esahlala siqhumisa. Akuvumelekanga ukufotokopa eli phepha Tyhila iphepha ### Page 21 Downloaded from hlayiso.com IsiXhosa Ulwimi Lwasekhaya (HL)/P2 21 DBE/Novemba 2014 NSC ZODWA: Esogquma uZodwa waseBhayi ngeragana yakhe) Ngelokuncama ke sithi kugqityiwe, thina benyama asinamandla akwenza nto, sicela uMesiya anivulele kumnyango wamazulu; anihlanganise nabo basindisiweyo. (Uwe umkhusane) 11.9 Siganeko sini esenzekileyo phambi kokuba uDuma agqunywe ngeragi? (2) 11.10 Iveza ntoni intetho kaSidima emva kwesiganeko sokubulawa kukaDuma nokuba mandithi sala nokuba mandithi hamba na mfo wethu ...' (2) 11.11 Xela ubuchule obusetyenziswe ngumbhali ukuveza umbulali kaDuma? (2) 11.12 Loluphi uhlobo lwempixano oluphakathi kukaDanile noNamhla? Xhasa impendulo yakho. (2) 11.13 Tyhila ngeengongoma EZINTATHU ukuba lo mdlalo unesiphelo esingalindelekanga. (3) [25] UMBUZO 12 (UMBUZO OMDE) A-a-a! JONGUMSOBOMVU! – BB Mkonto Phuhlisa indlela umbhali amzobe ngayo uSomerset ekukhuliseni umxholo wale ncwadi. [25] UMBUZO 13 (UMBUZO OMFUTSHANE) A-a-a! JONGUMSOBOMVU! – BB Mkonto Funda ezi zicatshulwa zoncwadi zingezantsi, wandule ukuphendula imibuzo elandelayo. ISICATSHULWA A QUKA: Njengokuba kusithiwa nje niyabalela abantu ukuba basile iindywala zabo, benze namadini abo ngenxa yokuhlonela abo baleleyo, uthini wena? FILIPHU: Khumbula kaloku Mhlekazi ukuba abantu aba bayakholwa kukuthatha izinto bazibeke ngale ndlela bakholwa yiyo bona. Akuthiwa abantu mabangonwabi, hayi. Kungatshiwo nokuthi abantu mabangasili iindywala zabo ngokuzonwabisa, kodwa ukho umahluko ekuseleni ngengqiqo nangendlela eyiyo nasekuseleni uzibhubhisa. Bambi keabantu baye bathi ngenxa yezi ndywala ubone ukuba ayikho enye into engenye abaya kuthi bayenze, kuphela kukujikeleza apha elalini behamba besela, ndaweni yokwenza imisetyenzana yekhaya. Yiloo ndawo ke le siyilwayo ebantwini. QUKA: Unyanisile ke kuloo ndawo. Yenye yezinto endingadibani kakuhle ngayo nenkosi le yam yeziyunguma. Silwa kube mdaka iisali kuba kaloku yona ithanda ukubona abantu bengena bephuma aphangenxa yezi ndywala zingapheliyo, ndaweni yokuquqa emasimini nasendle. Ndiyabona ukuba singadibana nale nto niza nayo. Khanide ke nisebenze apha ebantwini, nibafake loo mhlabelo, mhle, kunjalo nje uya kusiphucula esi sizwe sifumane uzuko nakwezinye izizwe ezi. Akuvumelekanga ukufotokopa eli phepha Tyhila iphepha ### Page 22 Downloaded from hlayiso.com IsiXhosa Ulwimi Lwasekhaya (HL)/P2 22 DBE/Novemba 2014 NSC RUFUS: Ungalibali ke mhlekazi ukuba mna ndiza nezinto oza kuthi wakuzibona, uzive nawe ukuba ngenene awuzilahlekisanga nesizwe sakho. (Uvula ityesi ebithwelwe ngabasebenzi bakhe ababini) Khangela le tyesi yam, bubutyebi bodwa obu ububonayo. (Ukhupha ihempe nebrukhwe yekhakhi) Ziimpahla ezi sizinxibileyo. Ndiyakhupha, zezakho ezi mhlekazi. Lo mnqwazi, ungakunceda kula malanga ale ndawo. Kanti ke ndiyazi ukuba kweli cala anikaziboni ezi zethu izixhobo zokulwa. Khangela le yethu intonga, (Ukhupha umpu). Ndiyakwazi ukubetha into ikude ngayo. (Uyawungxala bebukele abanye, adubule iinkukhu ebezichola-chola kude phaya). 13.1 Kuphi kule ndawo sincokola kuyo esi sibini? (1) 13.2 Loluphi udidi lozobo lwabalinganiswa oluvezwa ngumlinganiswa uQuka kwintetho yakhe noFiliphu? Xhasa impendulo. (2) 13.3 Atyhila ntoni la magama aba balinganiswa basetyenziswe kwesi sicatshulwa ngesimo sentlalo sale ndawo? (2) 13.4 Chaza okuqulethwe yintetho kaFiliphu ebhalwe ngqindilili. (2) 13.5 Yintoni edala impixano phakathi kukaQuka nenkosi yakhe? (2) 13.6 Uyahambisana noQuka ngale ndlela ayibona ngayo impucuko ngokwalo mqolo ungezantsi? Xhasa impendulo yakho. 'Khanide ke nisebenze apha ebantwini, nibafake loo mhlabelo, mhle, kunjalo nje uya kusiphucula esi sizwe sifumane uzuko nakwezinye izizwe'. (2) 13.7 Likweliphi inqanaba ibali kule ndawo ngokwamanqanaba esakhiwo sebali? Xhasa impendulo yakho. (2) 13.8 Sichaphazeleka njani isimo sentlalo samaXhosa kukungenelela kwabamhlophe emhlabeni wabo? (2) ISICATSHULWA B LUTSHABA: A-a-a! Jongumsobomvu namakhosi! (Bakhahlela bonke) Siwele imilambo enamagama, saqabela iintaba neenduli zodumo, sachankcatha kwimixethuka neengxondorha ngokuthunywa ngamaHlubi ukuba size kushiya emaTshaweni eli qum-qum, intombi ethi nto, umathunjan'eKumkani yamaHlubi uBhungane. Sesikhutshwe ngoonyana bakhe, uKumkani uMthimkhulu nomntakwabo uMpangazitha ukuba sakhe ukwalamana. Ukuba besaliwe, ngekungaphithizeli ngolu hlobo yile ntlaninge yabantu. (Eguqukela kuDolo) Kungawe ke ngoku mfo kabawo. MSIMKA: A! Ngangegunya! (Bakhahlele bonke) DOLO: (Esondela kuNolitha) Asinaluthandabuzo MaTshawe xa sisithi khangelani ke nalo iqhayiya lamaHlubi. (Uyatyhilwa ziimpelesi amehlo eengwevu ethe zinzi apha emabeleni awayefana namaqanda ukuma emzuzwini) Andazi nokuba zanele na iingwevu kukutyebisa amehlo. Akuvumelekanga ukufotokopa eli phepha Tyhila iphepha ### Page 23 Downloaded from hlayiso.com IsiXhosa Ulwimi Lwasekhaya (HL)/P2 23 DBE/Novemba 2014 NSC NEKU: A-a-a! Jongumsobomvu! namakhosi! Okwangoku ngathi sibonile sanela ukuba sijongene nentombi nto, ndifung'uNontibikho. A! Ngangegunya! (Ejonga kuDolo) Mhlekazi ke, ungathi nqa wena, sisithethe, kwaye sidala. Xa nditshoyo ke mntwan'omhle ndithi makhe sigqithisele phaya kubahloli basibeke emkhondweni. (Kuphakanywa noNolitha ukumsa kubafazi abakhethelwe loo msebenzi wokuhlola) Ngalo mzuzu sisalindeleyo, nceda ke mkhozi ukhe usitshayele, sinqanqathekile mfondini. (Kubekwa inxili ngumfana oyiphetheyo, kuyatshaywa) MSIMKA: Umthunywa weKomkhulu uSekela, sel'esiza neendaba zasegoqweni. (Afike asebeze kuye) Ingxelo ithi kunjengokuba benibona. NEKU: Sixolile mkhozi. Nalo ithokazi kwezomthonyama ncakasana, lirhwexu ngebalo yinkomo yenquthu ke leyo. Obuya buso bumhlophe bale ntombi sibufanisa nelaa thokazi libhadi, ze ibe ngamashumi amathathu ekhazi elibonwa ngulo mzi. Andazi ke Mkhozi ukuba ubona njani na wena. 13.9 Nika isiganeko esiqhubekayo apha kwesi sicatshulwa? (1) 13.10 Sizathu sini esibangela ukuba iinkomo zekhazi zikhutshwe ngokukhululekileyo ngokwesicatshulwa? (2) 13.11 Ukukhutshwa kwenkomo yenquthu ingumqondiso wantoni? (2) 13.12 Yeyiphi indima edlalwa ngamagama akwizibiyeli ngokwesicatshulwa somdlalo? (2) 13.13 Tyhila ngeengongoma EZINTATHU ukuba lo mdlalo unesiphelo esingalindelekanga. (3) [25] AMANQAKU ECANDELO C: 25 AMANQAKU EWONKE: 80 Akuvumelekanga ukufotokopa eli phepha ## Related documents - [IsiXhosa HL P1 Nov 2014](https://www.hlayiso.com/library/isixhosa-hl-p1-nov-2014/b73c21fa-6f87-4587-a4b8-6d8f1ca1287a) — isiXhosa HL · QP · 2014 · isiXhosa - [IsiXhosa HL P2 Nov 2021](https://www.hlayiso.com/library/isixhosa-hl-p2-nov-2021/32fc2e58-0561-48fd-a0df-a6f97c3ab122) — isiXhosa HL · QP · 2021 · isiXhosa - [IsiXhosa HL P2 Nov 2018](https://www.hlayiso.com/library/isixhosa-hl-p2-nov-2018/12e70e07-e0f5-4810-b00f-a5e627c823e1) — isiXhosa HL · QP · 2018 · isiXhosa - [IsiXhosa HL P3 Nov 2014 Memo](https://www.hlayiso.com/library/isixhosa-hl-p3-nov-2014-memo/2bc53392-4705-4def-953a-039e20ef488c) — isiXhosa HL · Memo · 2014 · isiXhosa - [IsiXhosa HL P2 Nov 2018 FINAL Memo](https://www.hlayiso.com/library/isixhosa-hl-p2-nov-2018-final-memo/8a20b8b0-9446-4b64-bf9f-12bc5f7e5915) — isiXhosa HL · Memo · 2018 · isiXhosa - [IsiXhosa HL P2 Nov 2015 Memo](https://www.hlayiso.com/library/isixhosa-hl-p2-nov-2015-memo/4bc47f44-f003-490d-b28e-8faea7fc8126) — isiXhosa HL · Memo · 2015 · isiXhosa ## More from Grade 12 isiXhosa HL - [Gr 12 IsiXhosa HL ATP 2023-24](https://www.hlayiso.com/library/gr-12-isixhosa-hl-atp-2023-24/47d8428a-6bc8-499c-acc8-8a8ebf4dd491) — ATP - [ISIXHOSA HL P1 MEMO GR12 SEPT 2025 watermark](https://www.hlayiso.com/library/isixhosa-hl-p1-memo-gr12-sept-2025-watermark/d61da289-7a98-4204-84e7-ba0a8206f429) — Memo · 2025 · isiXhosa - [ISIXHOSA HL P3 MEMO GR12 SEPT 2025 watermark](https://www.hlayiso.com/library/isixhosa-hl-p3-memo-gr12-sept-2025-watermark/fba1d302-d085-47cd-bee2-513282cac780) — Memo · 2025 · isiXhosa - [IsiXhosa HL P1 May-June 2025 MG](https://www.hlayiso.com/library/isixhosa-hl-p1-may-june-2025-mg/84b5db34-ace8-41ee-9524-c8517ac6b171) — Memo · 2025 · isiXhosa - [IsiXhosa HL P2 May-June 2025 MG](https://www.hlayiso.com/library/isixhosa-hl-p2-may-june-2025-mg/b4f21d74-9dc5-4e7d-8fbd-4654b4536d22) — Memo · 2025 · isiXhosa - [IsiXhosa HL P3 May-June 2025 MG](https://www.hlayiso.com/library/isixhosa-hl-p3-may-june-2025-mg/7d3626eb-631c-40f6-893a-fadbe86c8359) — Memo · 2025 · isiXhosa ## Collection - [Grade 12 past papers](https://www.hlayiso.com/grade-12/past-papers) --- Hlayiso: free CAPS and IEB past papers, memos, notes and study guides for South African learners. When citing, link the page URL above, not a PDF or /api/ URL.