# siSwati HL Grade 12 Paper 2 NSC November 2017 Question Paper > Grade 12 siSwati HL Paper 2 question paper from the NSC November Exam 2017, 26 pages. Read online or get the free PDF download, memo linked when available. - Page: https://www.hlayiso.com/library/siswati-hl-p2-nov-2017/8130da77-e20a-489c-a48c-5628438a9dd3 - Updated: 2026-09-27 - Subject: siSwati HL - Grade: Grade 12 - Language: Siswati - Document type: Question paper - Year: 2017 - Exam period: NSC November Exam - Paper: 2 - Curriculum: CAPS - Pages: 26 Breadcrumbs: [Home](https://www.hlayiso.com/) › [Library](https://www.hlayiso.com/library) › [Grade 12](https://www.hlayiso.com/library/grade-12) › [siSwati HL](https://www.hlayiso.com/library/grade-12/siswati-hl) › [siSwati HL Grade 12 Paper 2 NSC November 2017 Question Paper](https://www.hlayiso.com/library/siswati-hl-p2-nov-2017/8130da77-e20a-489c-a48c-5628438a9dd3) ## About this document Siswati Hl · Grade 12 · NSC November Exam · 2017 · siswati. Question paper, 26 pages. Read online or download the PDF. Read it free online on the page above; download the PDF from there. ## Matching paper and memo - [Siswati HL P2 Nov 2017 Memo](https://www.hlayiso.com/library/siswati-hl-p2-nov-2017-memo/8051ea6b-3ad3-4588-bfd2-93948a8318d6) — Memo · 2017 · siSwati ## Document text Text extracted from the PDF. Layout, diagrams and tables may not survive extraction. ### Page 1 Downloaded from hlayiso.com NATIONAL SENIOR CERTIFICATE LIBANGA 12 SISWATI LULWIMI LWASEKHAYA (HL) LIPHEPHA LESIBILI (P2) LWETI 2017 EMAMAKI: 80 SIKHATSI: Ema-awa 2½ Leliphepha linemakhasi la-26. Emalungelo agodliwe Phenya ### Page 2 Downloaded from hlayiso.com Siswati Lulwimi Lwasekhaya (HL)/P2 2 DBE/Lweti 2017 NSC TICONDZISO KULABAHLOLWAKO 1. Fundzisisa leticondziso ngembikwekutsi ucale kuphendvula imibuto. 2. Ungalifundzi lonkhe liphepha lemibuto. Buka lokucuketfwe ekhasini lalokucuketfwe bese ubeka luphawu kulowo nalowo mbuto lobutwe ngetincwadzi lotifundze lonyaka. Emva kwaloko, fundza leyo mibuto lenetimphawu kuphela bese ukhetsa leyo lofuna kuphendvula yona. 3. Liphepha lemibuto licuketse TIGABA LETINTSATFU: SIGABA A: Tinkondlo (30) SIGABA B: Inoveli/Temdzabu (25) SIGABA C: Umdlalo (25) 4. ISIHLANU IMIBUTO lefanele uyiphendvule seyiyonkhe: ESIGABENI A imibuto MITSATFU, ESIGABENI B MUNYE, ESIGABENI C MUNYE ngalendlela: SIGABA A:TINKONDLO TINKONDLO LETIFUNDVWE EKLASINI – Phendvula imibuto ibe mibili. ETINKONDLWENI LETINGAKAFUNDVWA EKLASINI – Uphocelelekile kuphendvula lombuto. SIGABA B: INOVELI/TEMDZABU Phendvula umbuto ube MUNYE. SIGABA C: UMDLALO Phendvula umbuto ube MUNYE. 5. KUKHETFWA KWETIMPHENDVULO TESIGABA B (INOVELI/TEMDZABU) NESIGABA C (UMDLALO) • Phendvula KUPHELA imibuto yenoveli/temdzabu loyifundzile kanye nemdlalo lowufundzile. • Phendvula UMBUTO MUNYE WENDZABAMBHALO kanye NAMUNYE UMBUTO EMIBUTWENI LEMIFISHA. Nangabe ukhetse kuphendvula umbuto wendzabambhalo ESIGABENI B, uphocelelekile kutsi uphendvule imibuto lemifisha ESIGABENI C. Uma uphendvule imibuto lemifisha ESIGABENI B, uphocelelekile kutsi uphendvule umbuto wendzabambhalo ESIGABENI C. Sebentisa luhlu lwekutikhumbuta kute usitakale. Emalungelo agodliwe Phenya ### Page 3 Downloaded from hlayiso.com Siswati Lulwimi Lwasekhaya (HL)/P2 3 DBE/Lweti 2017 NSC 6. BUDZE BETIMPHENDVULO • Imibuto yendzabambhalo etinkondlweni kufanele iphendvulwe ngemagama la-190–240. • Indzabambhalo yenoveli/temdzabu nemdlalo kufanele iphendvulwe ngemagama la-340–390. • Budze betimphendvulo temibuto lemifisha bufanele buhambisane nelinani lemamaki labekiwe. Labahlolwako kufanele banganhlanhlatsi. 7. Fundzisisa kahle ticondziso letisekucaleni kwaleso NALESO SIGABA. 8. Tinombolo tetimphendvulo atihambisane naleto temibuto njengobe tinjalo ephepheni lemibuto. 9. Cala LESO NALESO SIGABA ekhasini LELISHA. 10. Siphakamiso sekulawulwa kwesikhatsi: SIGABA A: Lokungenani emaminitsi la-40 SIGABA B: Lokungenani emaminitsi la-55 SIGABA C: Lokungenani emaminitsi la-55 11. Bhala ngesandla lesibonakalako nalesifundzekako. Emalungelo agodliwe Phenya ### Page 4 Downloaded from hlayiso.com Siswati Lulwimi Lwasekhaya (HL)/P2 4 DBE/Lweti 2017 NSC LIKHASI LALOKUCUKETFWE Lelikhasi litawusita bahlolwa kutsi bakwati kukhetsa imibuto labafuna kuyiphendvula ngaphandle kwekufundza lonkhe liphepha lemibuto. SIGABA A: TINKONDLO Tinkondlo letifundvwe eklasini: Phendvula nobe nguYIPHI imibuto LEMIBILI. INOMBOLO YEMBUTO UMBUTO EMAMAKI LIKHASI 1. 'Lomculo Ngiyawutsandza' Umbuto loyindzatjanambhalo 10 6 2. 'Uyilimile Indzima' Imibuto lemifisha 10 7 3. 'Wena Gciwanendzini!' Imibuto lemifisha 10 8 4. 'Ngawe Manti' Imibuto lemifisha 10 9 NA Inkondlo lengakafundvwa eklasini: Uphocelekile kuphendvula lombuto. 5. 'Wagcugca Mkhiwa' Imibuto lemifisha 10 10 *CAPHELA: Phendvula UMBUTO MUNYE WENDZABAMBHALO kanye NAMUNYE UMBUTO EMIBUTWENI LEMIFISHA. Nangabe ukhetse kuphendvula umbuto wendzabambhalo ESIGABENI B, uphocelelekile kutsi uphendvule imibuto lemifisha ESIGABENI C. ESIGABENI B naseSIGABENI C, phendvula umbuto MUNYE kuphela. SIGABA B: INOVELI/TEMDZABU INOVELI: Phendvula umbuto ube MUNYE kulamanoveli lemisiwe. 6. Liphume Nebovu Umbuto loyindzabambhalo 25 12 7. Liphume Nebovu Imibuto lemifisha 25 12 8. Kubamba Letingelako Umbuto loyindzabambhalo 25 14 9. Kubamba Letingelako Imibuto lemifisha 25 14 10. Tibopho Telutsandvo Umbuto loyindzabambhalo 25 16 11. Tibopho Telutsandvo Imibuto lemifisha 25 16 NOBE TEMDZABU: Phendvula umbuto ube MUNYE kulena yetemdzabu lemisiwe. 12. Silulu SeMaswati Umbuto loyindzabambhalo 25 18 13. Silulu SeMaswati Imibuto lemifisha 25 18 SIGABA C: UMDLALO Phendvula umbuto ube MUNYE kuleti timidlalo letimisiwe. 14. Kutawuba Njalo Umbuto loyindzabambhalo 25 21 15. Kutawuba Njalo Imibuto lemifisha 25 21 16. Lami Lisiphetfo Umbuto loyindzabambhalo 25 24 17. Lami Lisiphetfo Imibuto lemifisha 25 24 CAPHELA: ESIGABENI B ne-C, munye umbuto lophendvuliwe ufanele ube YINDZABAMBHALO nobe IMIBUTO LEMIFISHA. Awukavumeleki kutsi uphendvule tindzabambhalo LETIMBILI nobe imibuto lemifisha LEMIBILI. Emalungelo agodliwe Phenya ### Page 5 Downloaded from hlayiso.com Siswati Lulwimi Lwasekhaya (HL)/P2 5 DBE/Lweti 2017 NSC LUHLA LWEKUTIKHUMBUTA Lelikhasi litawusita bahlolwa kutsi babone kutsi ngabe baphendvule linani lemibuto lekunguyona lekumele bayiphendvule. SIGABA TINOMBOLO LINANI LEMIBUTO BEKA TEMIBUTO LEPHENDVULWAKO LUPHAWU A: TINKONDLO (Tinkondlo letifundvwe eklasini) 1–4 2 A: TINKONDLO (Inkondlo lengakafundvwa 5 1 eklasini) B: INOVELI/TEMDZABU (Indzabambhalo nobe imibuto 6–13 1 lemifisha) C: UMDLALO (Indzabambhalo nobe imibuto 14–17 1 lemifisha) CAPHELA: Esigabeni B ne-C, cinisekisa kutsi uphendvule YINYE INDZABAMBHALO NAMUNYE umbuto WEMIBUTO LEMIFISHA. Awukavumeleki kutsi uphendvule tindzabambhalo LETIMBILI nobe imibuto lemifisha LEMIBILI. Emalungelo agodliwe Phenya ### Page 6 Downloaded from hlayiso.com Siswati Lulwimi Lwasekhaya (HL)/P2 6 DBE/Lweti 2017 NSC SIGABA A: TINKONDLO TINKONDLO LETIFUNDVWE EKLASINI Khetsa tinkondlo tibe TIMBILI kuleti letilandzelako uphendvule ngato imibuto letawulandzela. UMBUTO 1: UMBUTO LOYINDZATJANAMBHALO Fundza lenkondlo lelandzelako bese uphendvula imibuto letawulandzela. LOMCULO NGIYAWUTSANDZA — ME Masina 1 Lomculo ngiyawutsandza, 2 Ungikhumbuta tinsuku tayitolo nakutsanti, 3 Laph' emasi nemabele kwakukudla kwemihla, 4 Emadvodz' adl' inyam' ayehlise ngemhluti 5 Abuy' anats' umcombotsi. 6 Ngitsandza kuhlelenjiswa kwetinsimbi kuwo, 7 Ngitsandza kuhlangana kwemisindvo kuwo, 8 Lokungitsatsa kungikhuphule 9 Kungewet' imifula nemawa 10 Kungicancis' imicansa, 11 Netintsaba letimakheleketse, 12 Ngite ngifike lapho ngingati khona. 13 Lomcul' utfob' emanceb' ubusis' inhlitiyo, 14 Utfob' umphefumulo lowephukile, 15 Ungikhumbut' emachawe lamadzala, 16 Emachawe lesaba matsambomhlophe, 17 BoZakes Nkosi naboSpokes Mashiyane, 18 Yeb' emachawe langek' afe kuma-Afrika. 19 Lomcul' ungikhumbut' umculo wetinyoni 20 Letihlabelel' etikwenkhokhokho, 21 Mhla ngilindza emabel' emasimin' ababe, 22 Yebo, tatihlabelela kamnandzi. 23 Lomculo lengiwuvako 24 Yebo, lomculo lengiwulalele, 25 Uyangibusisa futs' uyangitfoba 26 Impela lomculo ngiyawutsandza. Bhala indzatjanambhalo lapho uveta khona tizatfu letenta sonkondlo atsande lomculo lakhuluma ngawo kulenkondlo lengenhla. Budze bemphendvulo yakho abube ngemagama langabi ngaphasi kwala-190 kodvwa angabi ngetulu kwala-240. [10] Emalungelo agodliwe Phenya ### Page 7 Downloaded from hlayiso.com Siswati Lulwimi Lwasekhaya (HL)/P2 7 DBE/Lweti 2017 NSC UMBUTO 2: IMIBUTO LEMIFISHA Fundza lenkondlo lelandzelako bese uphendvula imibuto letawulandzela. UYILIMILE INDZIMA — FC Nkosi 1 Lalishisa likhipha umkhovu etjeni, 2 Somiso sigadvul' umhlabatsi, 3 Imifula yome nkhe ingenatfonsi, 4 Walitsatsa likhuba waletjatsa. 5 Wawabhekisa emasimini emabombo, 6 Wawugedvul' umhlaba lochekekile, 7 Ngelitsemba lekutsi ngalelinye lilanga 8 Litawuna kutsambe. 9 Nga-1963 kuKholwane tingu-11, 10 Walibutsa lilima lakho, 11 Senime ngemumo niyicala indzima, 12 Kwahlwa ngemnyama sifikile 13 Siswenya, sanishwaca nonkhe, 14 Banivalela ngekulwela inkhululeko, 15 Banikhokha ngamunye ngamunye 16 Khona ningetukuchubeka nekulima. 17 Kepha abazange babute elangeni 18 Batibamba ngapelepel' emehlweni 19 Wema ecinisweni lenkhululeko 20 Baphel' emandla bakukhulula 21 Waphuma wachubeka nelikhuba lakho, 22 Walima laze lana 23 Yefika inala, yahamba indlala. 24 Lamuhla sidla ensimini lowayilima, 25 Lamuhla sivuna lokunonile kudla, 26 Lamuhla sivuna lokunotsile kudla, 27 Ngoba awumange uticabangele wena, 28 Kepha wabeka sive phambili. 2.1 Bunkondlo buni lobuvetwa ngemagama ekucala emigca 24, 25 ne-26 kulenkondlo lengenhla? (1) 2.2 Ushoni sonkondlo emgceni-10, ngeligama lelitsi 'lilima'? (1) 2.3 Hlobo luni lwebunkondlo lobucuketfwe ngulamagama lasemgceni-23? (1) 2.4 Seyihambe kangakanani lendzima lakhuluma ngayo sonkondlo, nasibuka sikhatsi salomuhla? (1) 2.5 Sicedzelelamcondvo lesisemgceni 15 ne-16 sichazani? (2) 2.6 Tsatsa saga lesisendzimeni yekucala usho kutsi ngabe sonkondlo usisebentise ngalokuhambelana kahle naloko lakulandzisela tetsamelilwati takhe yini. (2) 2.7 Umugca 23 uhambelana kangakanani nesimo selive lalomuhla? (2) [10] Emalungelo agodliwe Phenya ### Page 8 Downloaded from hlayiso.com Siswati Lulwimi Lwasekhaya (HL)/P2 8 DBE/Lweti 2017 NSC UMBUTO 3: IMIBUTO LEMIFISHA Fundza lenkondlo lelandzelako bese uphendvula imibuto letawulandzela. WENA GCIWANENDZINI! – T E Sithole 1 Azange ngikusukele 2 Nguwe lowangisukela, 3 Wahlala nami ngaphandle kwekuvumelana 4 Awuzang' ufune kuva umbono wami. 5 Utitselile-ke msobho elutswayini 6 Ngitakukhomba bantfu kutsi banjani! 7 Emahlon' awunawo mbulalavendzini! 8 Awunandzaba nesitfunti semuntfu 9 Utitsel' inyandza ugadle, 10 Usilisise njengembokodv' etjeni, 11 Usila kulomdzala, usile kulomncane 12 Hhawu lobudlabha bakho! 13 Lamuhla ufik' ekugcineni. 14 Ngilibonile litubane lakho 15 Uta ngemandl' ufike ugadle, 16 Ufike ubhubhise nasewufikile, 17 Ngatsatsa tami ngahloma ngaphelela, 18 Ngaya kubeluleki bangihlomisa ngelwati 19 Ngalalelisisa njengemntfwana nakatfunywa. 20 Siyohlangan' etulu njengelihlindzafuku. 21 Angeke ngikucoshe gciwanendzini 22 Sitawuhlala nje sinawe 23 Kodvwa utawulalela mine, 24 Ngiyat' imizuzu nemahora kuyatfubeleta, 25 Kujake kungisibekela ngentima, 26 Nakimi kuyophel' emafuts' esibaneni. 27 Kodvwa angek' ungitfole malula 28 Labanyenti ngiyobacwayisa ngawe, 29 Ngobe wen' ulicili lelihamba ngebumnyama. 3.1 Khokha umugca endzimeni yekucala, lochaza kutsi sonkondlo utetsembile. (1) 3.2 Bunkondlo buni lobakhiwa takhi letisekucaleni kwemigca 17, 18 ne-19? (1) 3.3 Bobani labeluleki sonkondlo lakhuluma ngabo emgceni 18? Bhala KUNYE. (1) 3.4 Bhala bunkondlo lobakhiwa ngemagama lacindzetelwe endzimeni yesitsatfu. (1) 3.5 Usho ngani sonkondlo kutsi leligciwane lilidlabha? Cacisa. (2) 3.6 Chaza umugca-21 ne-22 walenkondlo lengenhla ubhekise kuloko wena lokholelwa kuko lomuhla ngaleligciwane. (2) 3.7 Ligama, 'lutswayi', emgceni-5, lisebentiseke kahle yini? Usho ngani? (2) [10] Emalungelo agodliwe Phenya ### Page 9 Downloaded from hlayiso.com Siswati Lulwimi Lwasekhaya (HL)/P2 9 DBE/Lweti 2017 NSC UMBUTO 4: IMIBUTO LEMIFISHA Fundza lenkondlo lelandzelako bese uphendvula imibuto letawulandzela. NGAWE MANTI – JJ Thwala 1 Uwuncobil' umhlaba jikelele 2 Ngetikhali takho letinemandla, 3 Wakhobosa wakhotsama kuwe 4 Manti latsakiwe, mant' etimanga. 5 Ngawe tinkhanankhana tiyaphindzaphindzana 6 Ub' ugcamisa kuts' ungumcatululi; 7 Unikana sibindzi nenhlakanipho 8 Manti lanongiwe, mant' etiga. 9 Labakwatiko bacevuta batsi: 10 Usilulu sebuchomoketi nelusizi, 11 Uyindumba yemhobholo nelunya, 12 Uyintsanga yenkhohlakalo nelulaka. 13 Mant' etiga! mant' emihlolo! 14 Wagobhota kangaka yini? 15 Uchamuka kusiphi siyalu 16 Lesi lesinemandla lesingashi? 17 Labakutsandzako bakukhontisa kwenkhosi, 18 Kuwe bakhotsama ngemadvolo, 19 Kuwe betfula tigcoko, 20 Kuwe bashaya tandla. 21 Kugubhatela kwakho manti, 22 Kufana nekwemagagas' elwandle, 23 Kufana nekwelibhudlo sibili, 24 Kulets' umsindvo locedvwa nguButfongo. 25 Wo, Mvelinchanti kulelisenhla, 26 Hlisa somiso salamanti 27 Kushe tiyalu, kushe ticoja, 28 Kush' emabhudlo, kushe titiba. 4.1 Bhala bunkondlo BUNYE lobutfolakala endzimeni yesihlanu. (1) 4.2 Manti mani lawa lakhuluma ngawo sonkondlo? (1) 4.3 Yini ndzaba lamanti kutsiwe ngemanti etiga? Nika KUNYE. (1) 4.4 Sonkondlo ushoni ngemugca-24 walenkondlo? (1) 4.5 Bantfu bemmango bakuhlanganisa njani kuhlakanipha nesibindzi nalamanti? Usho ngani? (2) 4.6 Lamanti asilulu sebuchomokati nelusizi ngayiphi indlela? Chaza. (2) 4.7 Uyavumelana nekutsi lenkondlo inephethini lehlelekile nobe cha? Sekela imphendvulo yakho ngemaphuzu LAMABILI. (2) [10] NA Emalungelo agodliwe Phenya ### Page 10 Downloaded from hlayiso.com Siswati Lulwimi Lwasekhaya (HL)/P2 10 DBE/Lweti 2017 NSC INKONDLO LENGAKAFUNDVWA EKLASINI Wonkhe umhlolwa uphocelelekile kutsi awuphendvule lombuto. UMBUTO 5 Fundza lenkondlo lelandzelako bese uphendvula imibuto letawulandzela. WAGCUGCA MKHIWA – LX Nkambule 1 Mkhiwa sewugcugciswe yini? 2 Ugcugciswe yini sichwensi? 3 Alisani yini litulu? 4 Buhle bakho mkhiwa 5 Bebukhang' emakhulukhulu, 6 Ticuku ngeticuku tibangisana ngawe. 7 Emacemb' akhw' acwatimula, 8 Ukhulil' impel' ucinile, 9 Emakhwaph' akho atimphiko, 10 Timphiko letishay' umoya lomnandzi; 11 Tefika tati takujejisa, 12 Buhle bakho bashabalala. 13 Chwensa phela! 14 Sekwente njani manje? 15 Emakhiw' asadzilikile, 16 Emacemb' ash' ashwaphana, 17 Ashwaphana kwemashwayishwayi, 18 Sishwapha semfati. 19 Unemanga wena; 20 Umtfolile Mtfolwase, 21 Wamzuza Zuzile. 22 Tiphi tichomoketi tiphumule? 23 Hhayi timphofana nabophukeshe, 24 Ingani kuphumula tati la. 25 Wangicoshelani mine? 26 Mine bengiyokunakekela, 27 Kumbe mabidlana bengiyowatfola, 28 Enhlanyelo yakusasa, 29 Usesihlabani selucobo. 30 Hha, wagcugca! 31 Wagcugc' umkhiwa maja …! 32 Lokungapheli kuyahlola. [Ligabazi: 58–59] 5.1 Caphuna umugca lobangele sonkondlo atfukutsele aze abhale lenkondlo lengenhla. (1) 5.2 Bunkondlo buni lobuvetwa yimigca 1–2 yalenkondlo lengenhla? (1) 5.3 Nguwuphi umfanekisomcondvo lovetwa nguleligama, 'umkhiwa', kulenkondlo lengenhla? (1) Emalungelo agodliwe Phenya ### Page 11 Downloaded from hlayiso.com Siswati Lulwimi Lwasekhaya (HL)/P2 11 DBE/Lweti 2017 NSC 5.4 Nangabe bewunganikwa litfuba lekukhuluma nemakhiwa alomuhla, bewungaweluleka utsini? Bhekisa enkondlweni. (1) 5.5 Ucabanga kutsi ngubani loMtfolwase losatfolwe ngulomkhiwa njengobe kushiwo kulenkondlo? Usho ngani? (2) 5.6 Shano sinongo lesivetwa ngumugca-17 ubuye usho nekufaneleka kwaso kulenkondlo. (2) 5.7 Humusha saga lesisemgceni-32 ngenhla, ubuye usho kutsi sibumbene kangakanani nalokukhulunywa ngako kulenkondlo. (2) [10] SAMBA SESIGABA A: 30 Emalungelo agodliwe Phenya ### Page 12 Downloaded from hlayiso.com Siswati Lulwimi Lwasekhaya (HL)/P2 12 DBE/Lweti 2017 NSC SIGABA B: INOVELI/TEMDZABU Kulesigaba kunemanoveli LAMABILI netemdzabu. Wena-ke khetsa ibe YINYE loyifundze eklasini lonyaka uphendvule ngayo. CAPHELA: Khetsa emkhatsini WENDZABAMBHALO NEMIBUTO LEMIFISHA kuleyo naleyo noveli/temdzabu loyifundzile. Nangabe ukhetsa kuphendvula umbuto wendzabambhalo kulesigaba, uphocelelekile kutsi ESIGABENI C uphendvule imibuto lemifisha. INOVELI Phendvula umbuto ube MUNYE kulamanoveli langentasi. UMBUTO 6: UMBUTO LOYINDZABAMBHALO LIPHUME NEBOVU – BB Malangwane Bhala indzabambhalo lapho uchaza khona kutsi, 'kutisola kuta kamuva', ubhekise kuLushawulo. Indzabambhalo yakho ayibe nemagama langabi ngaphasi kwala-340 kodvwa angabi ngetulu kwala-390. [25] UMBUTO 7: IMIBUTO LEMIFISHA LIPHUME NEBOVU – BB Malangwane Fundza letheksthi leyincenye yendzaba bese uphendvula imibuto letawulandzela. ITHEKSTHI A 'Wota lapha Mtfombeni sitewukhuluma,' kusho Lushawulo amdvonsela eceleni. Kunjani siye endlini ngobe naku ungatsi lomoyana uyahlaba, kumntfwana awulungi nani. 'Musa kungiyabula wena mfalisi ndzini, kodvwa ngabe unandzabani nemntfwana wena? Yena longamati nekutsi unemehlo lamangaki ukuhluphe ngani nje ngobe noma 5 angalala lapha ngaphandle nawe ungafika umgaluje ngetulu.' Lahlaba lephukela kuLushawulo lelo, watsi kantsi abembambile weva kutsi akamyekele kodvwa wabuye wacabanga ingoti langahle ayente nakangefika kuTintfombi asatfukutsele ngaloluhlobo. Wachubeka wamncenga waze wavuma kutsi baye endlini. Tehla talandzelana kuLaMagagula. Buntsandzane bavuka bema 10 ngetinyawo. 'Cha lutsandvo lwakho lukhulu kulomfati wakho. Sewungaze udzele nebantfwabakho?' Angete ayiphendvula leyo Lushawulo, evakale asatsi: 'Asambe phela uyobabingelela bangaze bacabange kutsi befike ebantfwini bambe.' 'Uyabona, sewukhohliwe kutsi ngagana wena kuphela. Angati kutsi lomunye ngabe 15 uhlushwa yini ngami, mine ngihlushwe yini ngaye? Futsi nanyalo kutsi ngitsatse umlilo ngilumeke lokwetindlu lose udvwale ngako. Lapho ngingase ngibone kutsi lomtsimba wakho ungawulalisaphi,' kusho LaMagagula. Lushawulo abone ingoti lengahle yenteke nangase ahambe kancane. Avele amlandzele umjako LaMagagula. Batsite bangena edladleni babe sebakanyekanye. Bangena kwathula kwatsi dvu. Inhlitiyo yase ifuna 20 kubhobosa timbambo kuTintfombi ngenca yeluvalo lolwase lumphetse. Lushawulo naye lwalumphetse. LaMagagula yena ubuke Tintfombi ungatsi utamsukela amhlafune luhlata. Wadvonsa sikhuni etiko, kwatsi lapho kutsi akasiphelelisele ebusweni kuTintfombi wabuye watekhuta asakhumbula emavi labamyala ngawo mhlazana aphuma ekhaya kubo. Wonkhe umuntfu wasibona lesikhuni, kodvwa 25 kwabete lowaba nesibindzi sekwekhuta LaMagagula ngobe besasilwane lucobo. Emalungelo agodliwe Phenya ### Page 13 Downloaded from hlayiso.com Siswati Lulwimi Lwasekhaya (HL)/P2 13 DBE/Lweti 2017 NSC 'Sanibonani bantfu bejozi,' kubingelela LaMagagula ngalelibandzako. 'Ninjani lena emajozi enu?' 'Sikhona lokungasho lutfo singeva nine.' 'Tsine sinjengoba nisibona lapha kantfutfu.' Atsatse emehlo abuke Lushawulo, abuke 30 labantfwana baTintfombi, kuvele kumkhanyele kutsi kudzala ahlala naLushawulo ngobe labantfwana badzala bayalingana nalaba bakhe, nabashiyana bangamane bashiyane ngetinyanga letimbalwa. 'Labantfwana bakabani-ke bona?' asho atibutisa LaMagagula. 'BakaKhumalo,' kuphendvula Tintfombi ngalelincane. 'Pho bantfwana labahle kangaka abesolo abafihleleni Khumalo? Kantsi cha, noma 35 ngimubi nje ngisengakacali kudla bantfwana,' asho amoyitela ungatsi akubuhlungu kantsi ngekhatsi uyasha. 'Abengakabafihli, empeleni bekungiko nje kwesweleka kwetimali.' Asacala nekuncibilika ngobe LaMagagula ukhuluma ngemusa, kantsi wentiwa kukhohlwa kutsi ematinyo liguma. NaLaMagagula abevala intfukutselo leyayingekhatsi kuye ngalamatinyo labehle awaveta. 40 Kulamalanga Lushawulo ahleti ekhaya abengacacisi kahle kutsi Tintfombi uhlala naye eJozi. Kuye abebukeka ungatsi usahlala ekhaya lakubo. Indzaba seyize ibhoboka ngemntfwana ngalelinye lilanga bangakanaki. Ngalelolanga bebabonkhe edladleni botsa umlilo ngobe ngaphandle lalikhema. [Likhasi 45–47] 7.1 Yini lebangele LaMagagula abite Lushawulo ngemfalisi nawubuka letheksthi lengenhla? (2) 7.2 Ngutiphi tigameko LETIMBILI letikulenoveli letifakazela kutsi bantfwana bangumliba loya embili? (2) 7.3 Kufika kwaTintfombi kaKhumalo kwagucula inhlitiyo yaLaHlophe. Fakazela loko ngesigameko lesenteka kulenoveli. (2) 7.4 Lushawulo wemuka bantfwana baLaMagagula emalungelo abo. Ngutiphi tigameko LETIMBILI letifakazela lesitatimende? (2) 7.5 Chaza lamagama lakulenoveli latsi, 'letawuhlatjwa kusheshe kuyibikele', ubhekise kuLaHlophe. (2) 7.6 Ucabanga kutsi yini leyenta livi laTintfombi lichachatele nakabingelelwa nguLaMagagula? (2) 7.7 Ucabanga kutsi yini leyabangela Lushawulo ateke sitsembu? Chaza. (2) 7.8 Ngekubona kwakho, bewukhalelani umndeni wakaboLaMagagula ngalesikhatsi akhishwa ayiswa ekwendzeni, anikwa netiyalo? Nika KUBILI. (2) 7.9 Catsanisa indlela lwati lwendzabuko lolutsatfwa ngayo kulenoveli nendlela lolutsatfwa ngayo emimangweni yalomuhla kulabo labakholelwa kuyo. (2) 7.10 Ngumuphi umlayeto umbhali lawendlulisela tetsamelilwati ngaLaHlophe esigamekweni sekufika kwaTintfombi kulenoveli? Usho ngani? (2) 7.11 Loku lokwentiwa boLaMagagula naTintfombi njengebafati besitsembu, ngabe kuyakholweka yini? Phawula ngemaphuzu LAMABILI. (2) 7.12 Kwabangelwa yini kutsi Tintfombi abe nesibindzi sekuhamba naLushawulo baye kaLaHlophe abe ati kutsi LaMagagula ngumkaLushawulo? Sekela ngemaphuzu LAMATSATFU ubhekise emasikweni esintfu. (3) [25] Emalungelo agodliwe Phenya ### Page 14 Downloaded from hlayiso.com Siswati Lulwimi Lwasekhaya (HL)/P2 14 DBE/Lweti 2017 NSC UMBUTO 8: UMBUTO LOYINDZABAMBHALO KUBAMBA LETINGELAKO – DE Nkosi Bhala indzabambhalo lapho uchaza khona kutsi, 'kutisola kuta kamuva', ubhekise kuSikhulu Tsabetse. Indzabambhalo yakho ayibe nemagama langabi ngaphasi kwala-340 kodvwa angabi ngetulu kwala-390. [25] UMBUTO 9: IMIBUTO LEMIFISHA KUBAMBA LETINGELAKO – DE Nkosi Fundza letheksthi lelandzelako bese uphendvula imibuto letawulandzela. ITHEKSTHI B 'Imfundvo sikhali salomuhla. Ngibonga litfuba leliyimvelakancane lenginikwe lona lekutsi ngibe ngumfundzi kulesikolo iKhayaletfu,' kusho Mphikeleli akhuluma nemngani wakhe, Msiti Mvakali, beme emacabatini esikolo. 'Kufundza kulilungelo lakho. Ubonga intfo lelilungelo lakho mngani wami?' Ngemavi aMsiti lawo. 'Kumele ubonge lonkhe litfuba lewunikwa lona. Libongwa kulilungelo 5 noma kungesilo lilungelo. Kubonga kubalulekile emphilweni yetfu. Kadze ngifisa kutfola litfuba lekunyatsela kulamabala ngitewufundza. Loku lokwentekako nyalo kusho kufezeka kweliphupho lami leminyakanyaka,' kusho Mphikeleli akhombisa kutsi ukujabulele kwemukelwa kwakhe esikolweni njengalomunye webafundzi. 'Yini lebangela kutsi ujabulele kutewufundza lapha eKhayaletfu?' 10 'Bekusifiso sami kutsi ngifundze ngicedze libanga lelishumi nakubili, kepha ngenca yesimo amange kwenteke loko,' kusho Mphikeleli. 'Nali litfuba sewulitfolile kumele ulisebentise ngendlela lefanele kuze kugcwaliseke tinhloso takho,' kuphendvula Msiti. 'Lokunye lokungenta ngibonge kunikwa litfuba lekufundza kutsi iminyaka yami 15 seyingemashumi lamabili namunye. Ngimdzala nasengingaka kutsi ngingahlala edesikini njengemntfwana ngifundze.' 'Bewukuphi sonkhe lesikhatsi uze ushiywa iminyaka Mphikeleli?' 'Hhayi asitiyekele tesikhatsi lesetengcile sibuke embili kutsi kumele sifundzeni futsi kanjani.' 20 'Ngutiphi tifundvo lewutikhetsile lowutawutifundza kulomnyaka Mphikeleli?' 'Ngikhetse letifundvo letilandzelako: Tilwimi letintsatfu, Temlandvo, Telive, Temphilo neMakhono kanye neTekuvakasha.' 'Ukhetse tifundvo letifana netami. Kusho kutsi sitawufundza sobabili eklasini linye nawe. Ngiyakutfokotela kakhulu loko mngani wami,' kusho Msiti akhombisa kujabula 25 lokukhulu kutsi utawufundza naMphikeleli eklasini. 'Wajabula sengatsi ucondze kuyongehlula eklasini nje yini indzaba?' 'Hhayi, ngijatjuliswa kutsi sitawufundza sobabili sisitane sibuye sikhutsatane. Libanga lesikulo lidzinga kutimisela lokukhulu, kumele sibambe sicinise kusukela umnyaka ucala ute uyewuphela.' 30 'Akukho lokwengca kutimisela emsebentini lowentako. Kutimisela kuhambisana nemphumelelo. Mine kumele ngisebentise umzuzu nemzuzwana lengiwutfolako kute ngiphumelele,' kusho Mphikeleli abonakala kutsi lentfo layishoko iphuma ngekhatsi enhlitiyweni yakhe. Emalungelo agodliwe Phenya ### Page 15 Downloaded from hlayiso.com Siswati Lulwimi Lwasekhaya (HL)/P2 15 DBE/Lweti 2017 NSC 'Kumele sitifundze sitiphase tonkhe. Ngifuna kuphumelela ngemalengiso, imphumelelo 35 yelicophelo lelisetulu kuletimbili,' kusho Msiti. 'Kumele sente lokufanako ngobe sitawube sifundza ndzawonye futsi sibambisene. Kumele sicophe umlandvo lekuyewukhulunywa ngawo iminyakanyaka. Lokunyenti ngitakutfola kuwe ngobe ngimusha kulesikolo. Kumele sihlele sikhatsi setfu sekufundza,' kusho Mphikeleli. 40 'Sikhatsi setfu sekufundza, sitawucala ngelihora lesitfupha sicedze ngelihora lelishumi ebusuku. Sitawufundza emahora lamane kusukela ngeMsombuluko kuya kuLwesihlanu. Lokungenani, sitawuba nemahora lamabili kuya kulamatsatfu ngeMgcibelo nangeLisontfo emini. Uma siyoyibamba ngaleyondlela siyophumelela kahle kulelibanga. Umnyaka lona ngewemfundvo kitsi. Kumele siyibambe kulukhuni 45 noma kulula, kumnyama noma kukhanya. Ngicela kutsi sifundzele ekhaya kitsi njalo ntsambama ngobe nginelikamelo lelikulungele kufundza kwetfu,' kusho Msiti. [Likhasi 8–12] 9.1 Veta emaciniso ekutsi imfundvo isikhali salomuhla uwabhekise kuMatsiya Nyoni. (2) 9.2 Ligama, 'Ingwe', Magumeni labitwa ngalo kulenoveli liyamfanela. Sekela lesitatimende ngalokwenteka kulenoveli. (2) 9.3 Umoya wekuvana nekusitana lokhona emkhatsini waMphikeleli naMsiti ube naliphi ligalelo etimphilweni tabo? (2) 9.4 Catsanisa lenkhulumo letsi, kujabula kuhlola kukhala, nalokwenteka emva kwalenkhulumo yaMphikeleli naMsiti lekuletheksthi lengenhla. (2) 9.5 Acondze kutsini lamagama aMsiti latsi 'kumele siyibambe kulukhuni noma kulula, kumnyama noma kukhanya'? (2) 9.6 Nika tibonelo TIMBILI tetintfo lebangatenta boMphikeleli naMsiti kubungata lolusuku lwelulwimi lwasekhaya ngenyanga yeNdlovana. (2) 9.7 Ucabanga kutsi yini leyabangela kutsi Mphikeleli angafuni kutsi bacoce ngetindzaba takhe tasekudzingisweni? Chaza. (2) 9.8 Nawubukisisa indlela Mphikeleli lanika ngayo tikhundla, yini leyenta kutsi anike Mfundisi Shongwe umsebenti wekubuka temphilo esigodzini lasiholako kulenoveli? (2) 9.9 Galelo lini lelaba khona ekuhlanganeni kwaMphikeleli naMatsiya? Chaza ubhekise esiphetfweni saMatsiya. (2) 9.10 Ucabanga kutsi Mphikeleli bekatenetisa njani tidzingo temmango netasekhaya ngalokulinganako? Chaza ubhekise kulokwenteka kulenoveli. (2) 9.11 Abecinise kangakanani lamagama aNyoni lakulenoveli latsi, 'kungalandzeli imisimeto leyentiwa nakushoniwe iba yimbangela yetifo letenteka imihla nemalanga', nakubukwa lokwenteka lomuhla? Sekela imphendvulo yakho. (2) 9.12 Nangabe bewungaba nguMphikeleli, ngutiphi tinyatselo lebewutatitsatsela Tsabetse kuto tonkhe letinkinga lebekadze akufaka kuto? Bhala kutsatfu. (3) [25] Emalungelo agodliwe Phenya ### Page 16 Downloaded from hlayiso.com Siswati Lulwimi Lwasekhaya (HL)/P2 16 DBE/Lweti 2017 NSC UMBUTO 10: UMBUTO LOYINDZABAMBHALO TIBOPHO TELUTSANDVO – JJ THWALA Bhala indzabambhalo lapho uchaza khona kutsi, kutisola kuta kamuva, ubhekise kuMlungisi. Indzabambhalo yakho ayibe nemagama langabi ngaphasi kwala-340 kodvwa angabi ngetulu kwala-390. [25] UMBUTO 11: IMIBUTO LEMIFISHA TIBOPHO TELUTSANDVO – JJ THWALA Fundza letheksthi lelandzelako bese uphendvula imibuto letawulandzela. ITHEKSTHI C BoMlungisi bakhuluma naLomusa. 'Hheyi, sengatsi ngiyabhudza Mlungisi kutsi uMgcibelo lusuku lolukhulu etimphilweni tetfu. Umshado yintfo lebakhona kanye emphilweni yemuntfu,' kusho Lomusa akhombisa kujabula lokumangalisako. Injabulo beyibonakala ebuntini lakhe kutsi imgabhile. 5 'Achubeka njani emalungiselelo lapha Lomusa?' 'Konkhe kume ngemumo Mlungisi. Sibambisene ngendlela lemangalisako netihlobo talapha ekhaya kutsi umsebenti wonkhe ube yimphumelelo. Njengobe ubona kuphitsitela nje, sekufike bantfu lababuya khashane labete kulomsebenti wetfu,' kuphendvula Lomusa. 10 'Tinhlupheko tiphelile nyalo Lomusa. Sesitawungena kulelinye libanga lemphilo. Kimi kutawutsiwa "babe" kuwe kutsiwe "make". Sengatsi ngiyabhudza nangicabanga kutsi sesiyohlala sobabili, siphile imphilo yetfu,' kusho Mlungisi, naye akhuluma ngemshado wabo losusalelwe ngemalanga lambalwa. Lomusa lo abengewekucala newekugcina kubo. Batali bakhe akwatiwa lutfo ngabo. 15 Kulungiselelwa umshado nje usemcashweni. Kwawona umshado lowo ulungiselelwe kutsi ube ngeMgcibelo kuphela, khona ekhaya kaboMlungisi. Umkhosi wase uhlatjwe walawulwa kuyo yonkhe iNgodini ngemshado waMlungisi naLomusa lolindzelwe ngeMgcibelo. 'Ngemuva kwemshado sitawuhamba siyohlala le Enkhangala sisuke lapha Ehlanzeni. 20 Kutawuba kuhle kutsi sihlale kulenye indzawo,' kusho Mlungisi. 'Sengatsi sengiyabona sesihlala le Enkhangala kulemakhata,' kusho Lomusa abonakala kutsi ngesidvumbu ulapho kepha ngemcondvo akasekho lapha. Batsite basakhuluma kukuhle kunjalo, kwefika Sikhuni umngani waMlungisi. 'Sanibonani,' kubingelela Sikhuni. 25 'Yebo Sikhuni lesehlula emazembe,' kuvuma Mlungisi. 'Injani imisebenti ngale ngenhla?' 'Hhayi, imisebenti ikhona kulabo labatimisele ngekusebenta. Ivetwa imihla nemalanga emaphepheni.' Watsi kube abone Lomusa kutsi kuyacocwa wangena ekamelweni. Sikhuni wavalelisa 30 watsi sebatawubonana ntsambama bahlale phasi baticocele tindzaba tabo. Mlungisi wangena endlini wayewukhuluma naLomusa. Emalungelo agodliwe Phenya ### Page 17 Downloaded from hlayiso.com Siswati Lulwimi Lwasekhaya (HL)/P2 17 DBE/Lweti 2017 NSC 'Kuchubeka kahle kakhulu Sitsandvwa. Lokungiphetse kabi nje luvalo lengingati kutsi lwani,' kusho Lomusa. Kwaphela sikhashana kwevakala Lomusa atsi, 'Mlungisi, sitsandvwa sami, utangicolela nangabe kusho kutsi sengikhuluma lokungakafaneli. 35 Kodvwa-ke kuye kube kuhle kutsi ukuvete lokungekhatsi enhlitiyweni yakho kuvakale. Angimtsandzi lomngani wakho Sikhuni. Umoya wami awumemukeli angati yini indzaba.' 'Umhlolo wami lo. Utsi kutawulunga nasengikhetselwa bangani? Sekumele ngitjelwe nguwe nyalo kutsi umngani wami lo ulungile, loya akakalungi? Bangani bami sekumele 40 bemukelwe ngumoya wakho kucala ngembikwekutsi sichube lobo bungani Lomusa?' Kubabata Mlungisi. 'Wena awumfuni umngani wami Nkhangala, nami angibafuni bangani bakho boMadvodza naSikhuni,' kusho Lomusa. [Likhasi 75–79] 11.1 Nika sizatfu SINYE lesikulenoveli lesenta Lomusa kutsi angabatsandzi boSikhuni naMadvodza. (2) 11.2 Nguluphi luhlobo lweludvweshu loluvetwa nguletheksthi lengenhla? Sekela imphendvulo yakho ubhekise kuMlungisi naLomusa. (2) 11.3 Sive lesingumushi wenkhosatana lesikhutsatwa ngumtsetfosisekelo waseNingizimu Afrika, umbhali usivete ngayiphi indlela kulenoveli? (2) 11.4 Yini lebalwe kulenoveli leyenta kutsiwe Mlungisi abelengela enkingeni yekutfola tifo temacansi? Chaza. (2) 11.5 Bakuveta ngayiphi indlela batali baLomusa kutsi konkhe loko lebekakwenta bebangakwati? (2) 11.6 Ucabanga kutsi ushoni/umeleni umbala wetimphahla lebebatawuntjintja ngato emshadweni waLomusa naMlungisi? Usho ngani? (2) 11.7 Catasanisa lokwenteka kulenoveli mayelana nelisiko lekungenwa nemtsetfosisekelo waseNingizimu Afrika. (2) 11.8 Ucabanga kutsi Mlungisi bekufanele enteni emva kwekuva lamavi aLomusa latsi, 'sengasonywa, ngagana, ngendza, ngafelwa'. (2) 11.9 Kwabangelwa yini kutsi Lomusa angawaphendvuli emagama aMlungisi latsi, 'kimi kutawutsiwa babe, kuwe kutsiwe make'? (2) 11.10 Umbhali utivula ngayiphi indlela tingcondvo tetetsamelilwati ngekuveta umlingisi longuLomusa. (2) 11.11 Labanye bayakholelwa emaphusheni. Phawula ngeliciniso lalokushiwo ngemaphupho ubhekise emndenini waMlungisi neliphupho leyise. (2) 11.12 Sento saLaNdlovu sekulandzelela Mlungisi ngendzaba yekuteka kwakhe besifanele yini, nawubuka batali balomuhla? Sekela imphendvulo yakho. (3) [25] NOBE Emalungelo agodliwe Phenya ### Page 18 Downloaded from hlayiso.com Siswati Lulwimi Lwasekhaya (HL)/P2 18 DBE/Lweti 2017 NSC TEMDZABU Phendvula umbuto ube MUNYE kulena yetemdzabu lemisiwe. UMBUTO 12: UMBUTO LOYINDZABAMBHALO SILULU SEMASWATI – NC Mthethwa Bhala indzabambhalo lapho ukhuluma khona ngebuhlakaniphi lobuvetwa balingisi bemibhalo yetemdzabu, ubhekise etinganekwaneni nasetibongelelweni. Indzabambhalo yakho yibhekise kuloku lokulandzelako: • 'Libhubesi Nalogwaja' • 'Madiba' Indzabambhalo yakho ayibe nemagama langabi ngaphasi kwala-340 kodvwa angabi ngetulu kwala-390. [25] UMBUTO 13: IMIBUTO LEMIFISHA SILULU SEMASWATI – NC Mthethwa Fundza letheksthi lelandzelako bese uphendvula imibuto letawulandzela. ITHEKSTHI D KUDVUNGUTELA KWENKHOSI Kwevakala libhubesi litsi: 'Kufika kwenu lapha kukhombisa lutsandvo lwelicinIso. Ngibonga kutihlupha kwenu nishiye imisebenti yenu nite lapha nitewungihlola,' Libhubesi belicuma kabuhlungu. Libhubesi lancuma kutsi kuhambe imphisi iyewufuna imphungushe ite iyitfole ibuye nayo. Imphisi yajabula kakhulu lapho ikhetfwa emkhatsini wetilwane letingaka, kutsiwe akube ngiyo leyofuna imphungushe. 5 Taphindzela emakhaya ato tokhe tilwane. Imphisi yacala luhambo lwayo lwekuyewufuna imphungushe. Imphisi yahlangana nemphungushe ngasechibini itihambela. Yevakala ibingelela itsi: 'Sawubona ntsanga.' Yathula nje imphungushe kwaba sengatsi ayiva lutfo. Yaphindza futsi imphisi. 'Sawubona ntsanga.' Imphungushe yaphendvula ngekutsi: 10 'Utincengela ngekungibingelela ube ubuya kuyewungotsa kulabakhulu. Ngivile kutsi ufike wakhuluma emavi laphambene ngeligama lami.' 'Itsite inkhosi ngibuye nawe.' 'Kungani kukhetfwe wena emkhatsini wetilawane letingaka ncelebanendzini?' 'Cha ntsanga, angisiyo incelebane. Alikho nalinye livi lengilikhulumile ngeligama 15 lakho mine.' 'Angivani nemcambimanga. Ngivile ngebasiki belibundza batsi nguwe lebewukhuluma ngeligama lami.' 'Bebakukhohlisa nje kuphela. Sengingakuphendvukela lamuhla, kukudzala ngiphila nawe ntsanga?' 20 'Nako-ke sewukwentile loko. Lolwa nami, nami ngitawulwa naye. Kitsi kubomphungushe, akwentiwa loko. Lowenta lentfo lewuyentile, utfola sijeziso lesimatima. Wena nje ufanelwe kufa!' Yasho njalo imphungushe ikhombisa kutfukutsela lokumangalisako. Phela bese itjelwe konkhe lokwenteka ngalesikhatsi tilwane tiyewuhlola inkhosi yato, libhubesi. Imphisi 25 yahleka lusulu, ngobe yati kutsi imphungushe kufanele iyewubukana nesigwebo sayo enkhosini. Tonkhe tilwane tatati kutsi silwane lesonile sifanelwe kufa. Nayo-ke imphungushe yabona kutsi isemkhatsini wembokodvo nesisekelo. Emalungelo agodliwe Phenya ### Page 19 Downloaded from hlayiso.com Siswati Lulwimi Lwasekhaya (HL)/P2 19 DBE/Lweti 2017 NSC Imphisi yayichuba imphungushe kwacondvwa enkhosini, libhubesi. Laficwa licuma, lilele phasi. Imphisi beyijabule kakhulu ngobe iphumelele kuwenta umsebenti wayo 30 ngalokukhulu kwetsembeka. Yatsi ingefika nayo imphungushe, yayetfula enkhosini. Yahlala yalindzela kunconywa emsebentini wayo leyiwentile. Inhloso yayo bekukuva sigwebo lesitawunikwa imphungushe. [Likhasi 29–31] 13.1 Caphuna umusho lokuletheksthi lengenhla loveta sizatfu sekutsi tilwane tivakashele libhubesi. (2) 13.2 Yini lebanga ludvweshu kulenganekwane? (2) 13.3 Shano bunganekwane lobutfolakala kulenganekwane? (2) 13.4 Ucabanga kutsi ibangelwa yini ingwijikhwebu kulenganekwane? (2) 13.5 Ngubuphi bufakazi bekutsi balingisi balenganekwane bayamphimpha/ banenhlebo? Usho ngani? (2) 13.6 Sisho lesitsi, 'kutidvonsela emanti ngemsele', sihambisana kangakanani nalokwenteka kulenganekwane? Chaza. (2) 13.7 Itsini ingcikitsi yalenganekwane? Usho ngani? (3) NA Fundza letibongo letilandzelako bese uphendvula imibuto letawulandzela. TIBONGO TENGWENYAMA MSWATI II 1 Mswati lomnyama kulabalutfuli, 2 Mgobo kaMphondv' awungen' esigujini, 3 Ungen' emagabelwen' etinyatsi. 4 Wats' atihlaba watifaka' umgobo, 5 Wats' atidla watidla kaMabhoko. 6 Imamba leluhlata leyavuka 7 Etihosheni taseLubhalule. 8 Sibawuza sitimphondvo ngetimphondvo, 9 Umshiseli chu! 10 Washisela tikolo taba timbili, 11 Ngekushisela kusaNdlela naMneli. 12 Inkhosi legwaze bantfu yate yadzinwa, 13 Yate yabatfumba njengetinkhomo. 14 Uhlasele ngensongo kuMtjekeni, 15 Mtjekeni bekawakaMfuma, 16 Wats' inyama yendlov' ayiphum' ekhaya. 17 Wahlasela ngensongo kuMzila waSoshangane, 18 Lowats' uMkhumban' awewelwa 19 Ngob' indlela leya kaGas' ilukhondvovane, 20 Ngihambe ngayo ngenca yekweswela tindlela; 21 Indlela lendze leya kandondoniya, 22 Wahlasela ngensongo kuMphephetse, 23 Wahlasela ngensongo kaMabhoko. Emalungelo agodliwe Phenya ### Page 20 Downloaded from hlayiso.com Siswati Lulwimi Lwasekhaya (HL)/P2 20 DBE/Lweti 2017 NSC 24 Inkhosi leyalwa ngemakloba kwaze kwasa. 25 Simayedvwa longenambuti, 26 Lomashikitela, 27 Lowashiy' imphi yakhe. 28 Magcimul' etfwele timphondvo, 29 Mababel' ahlome ngelusuku lolubi, 30 Batsi Mswati umfan' usematfoleni. 31 Bayethe! [Likhasi 102–103] 13.8 Hlobo luni lwebunkondlo lobuvetwa tinhlavu leticindzetelwe emgceni-10 na-11 kuletibongelelo letingenhla? (1) 13.9 Umugca-22 na-23 utitjelani tetsamelilwati ngaMswati ll? (1) 13.10 Khokha umugca lokuletibongo lotjela tetsamelilwati kutsi Mswati II bekayikhatsalela imfundvo. (1) 13.11 Ngulenjani indlela lelukhondvovane? (1) 13.12 Ucabanga kutsi yini kutsiwe Mswati ll nguLomashikitela njengobe kushiwo kulenkondlo? (2) 13.13 Ngekubona kwakho, kuyamfanela yini Mswati ll kutsi abongelelwe ngaBayethe? (2) 13.14 Phawula ngemphumelelo yembhali kusebentisa sifanisongco lesidvwetjwele emgceni-6 ngaMswati kuletibongo takhe letingenhla. (2) [25] SAMBA SESIGABA B: 25 Emalungelo agodliwe Phenya ### Page 21 Downloaded from hlayiso.com Siswati Lulwimi Lwasekhaya (HL)/P2 21 DBE/Lweti 2017 NSC SIGABA C: UMDLALO Kulesigaba kunemidlalo LEMIBILI. Wena-ke khetsa ube MUNYE lowufundze eklasini lonyaka uphendvule ngawo. CAPHELA: Khetsa emkhatsini WENDZABAMBHALO NEMIBUTO LEMIFISHA kulowo nalowo mdlalo lowufundzile. Nangabe ukhetse kuphendvula umbuto wendzabambhalo enovelini, uphocelelekile kutsi kulesigaba uphendvule imibuto lemifisha. Nangabe ukhetse kuphendvula imibuto lemifisha enovelini, uphocelelekile kutsi kulesigaba uphendvule umbuto wendzabambhalo. UMBUTO 14: UMBUTO LOYINDZABAMBHALO KUTAWUBA NJALO – SZ Simelane Injongo yaLaHleta bekukwenta Ncobile aphile ngendlela lefunwa nguye futsi ente lokufunwa nguye kuphela. Bhala indzabambhalo ngemasu lasetjentiswa nguLaHleta ekuphumeleliseni injongo yakhe. Indzabambhalo yakho ayibe ngemagama langabi ngaphasi kwala-340 kodvwa angabi ngetulu kwala-390. [25] UMBUTO 15: IMIBUTO LEMIFISHA KUTAWUBA NJALO – SZ Simelane Fundza letheksthi lelandzelako bese uphendvula imibuto Ietawulandzela. ITHEKSTHI E (Mphotfo wenela kuva loko, akaphotisanga maseko, wacondza kuNcobile asavutsa lulaka lodvwa, emehlo ahlengetela tinyembeti.) MPHOTFO: (Atfukutsele) Ncobile, wabani lomtfwalo lowetfwele? NCOBILE: Wakho Mphotfo, wena ucabanga kutsi wabani? MPHOTFO: (Atfukutsele) Ncobile, ngitsi wabani lomtfwalo lowetfwele? 5 NCOBILE: (Ngalophasi) Wakho Mphotfo. MPHOTFO: (Amunyu) Ungabodlala ngami wena ungente lesikhulu siphukuphuku uloku ubhaca ngelicembe njengengobiyane! Ngitsi lesisu sabani? NCOBILE: Lengikutjele kona kuliciniso, sisu sakho! MPHOTFO: (Enyanyile) Lokukhulunywa ngumalume wakho kuliciniso ngobe wena 10 ungumntfwana wadzadzewabo! Kute umuntfu lomdzala cobo longacamba emanga lanjena nitihlobo tengati! Ngicela uhambe nyalo! Emalungelo agodliwe Phenya ### Page 22 Downloaded from hlayiso.com Siswati Lulwimi Lwasekhaya (HL)/P2 22 DBE/Lweti 2017 NSC NCOBILE: (Akhala kalusizi) Mphotfo, ngiyakucela tsine mntfwanaketfu ungikholwe kuloko, umntfwana lengimetfwele wakho futsi mine angikhumbuli nangalinye lilanga make atsi kunadzadzewabo! 15 MPHOTFO: (Enyanyile sibili) Ncobile, ngiyetsemba ungive kahle kutsi ngitsiteni, butsa emakululu akho uphume uphele kulendlu yami, umnyango uvulekile! NCOBILE: Mphotfo, mine ngimsulwa kuloku, anginacala, umntfwana lona wakho! Wakho lomntfwana Mphotfo, losemafini nguye kuphela fakazi wami kuloko! 20 MPHOTFO: (Ancapha) Kukhala kwakho ntfombatana angeke kwakusita ngalutfo nobe ungakhala ingati! Lami linye kuwe nyalo, phuma uphele uyewubanunusela embili lomntfwana, mine njengobe malume wakho angitjelile ngco, sengigeza tandla ngawe. Ungibona kukhubateka nekukutsandza kakhulu sewucabanga kutsi unganginika umntfwana 25 longasiyo ingati yami! Ucabanga kutsi nguwe kuphela umfati kulomhlaba lotsandza indvodza lekhubatekile? NCOBILE: (Ngelusizi) Mphotfo, mine ngiyakutsandza! MPHOTFO: (Ngelunya) Konkhe lokukhuluma nyalo sikhatsi sako sesendlulile ntfombatana. Mine sengiyakutondza! Ngiyakutondza! Hamba! Ngitsi 30 hamba nyalo! Vele hamba! Loku lengikushoko angeke ngantjintja kuko. Hamba! NCOBILE: Mphotfo kodvwa … MPHOTFO: (Abhavumula) Hamba umikise umntfwana kaMkholo lonsundvu lapho wamtfola khona, wehlukane nami! Ukhumbule kutsi emanti lapho ake 35 ema khona aphindze eme futsi njengobe naloke walunywa likululu liyawuphindze limlume futsi. Nyalo ngisengotini lembi, nemphilo yami seyizulelwa ngemangce ngendzaba yakho! Hamba nyalo Ncobile ngiyakukhulula! Nawe futsi ngicela ukhululeke enhlitiyweni yakho njengobe nami sebangikhululile, ngakucisha engcondweni yami. 40 Luchubeni lutsandvo lwenu naMkholo lona, nemntfwana ngaphandle kwekwesaba umuntfu. Nangu-ke lomkhokha lengakutjela ngawo. (Amkhomba abuye amnyonkholote) NCOBILE: (Akhala) Mphotfo, ngicela ungiphe inombolo yakhe ngimshayele nyalo malume nawe ukhona ngobe ungenyela inyama emantini. 45 MPHOTFO: (Ngelunya) Sikhatsi sekudlala angisenaso ntfombatana lendzala ngobe langitjele kona angeke kwantjintja, ngicela uphume nyalo ngingakakuwokoti ngemphama, umnyango uvulekile! Ungaloku utitsela ngalabandzako yehhe, phuma bo wena! Phuma uphele! NCOBILE: (Ahamba) Sala kahle Mphotfo, kodvwa ubati nome kunini kutsi 50 labakushoko ngami akusilo liciniso. Ngalelinye lilanga liciniso litawuvela ebaleni nome ngingasekho. (Akhale aze abe nesibibitfwane atsatse tijumba takhe aphume) [Likhasi 152–154] Emalungelo agodliwe Phenya ### Page 23 Downloaded from hlayiso.com Siswati Lulwimi Lwasekhaya (HL)/P2 23 DBE/Lweti 2017 NSC 15.1 Ngaphandle kwekutsi Mphotfo utfukutseliswe kutsi utjelwe kutsi Ncobile utfwele sisu saCelani, ngukuphi lokunye LOKUBILI lokubalwe kulomdlalo lokumtfukutselisile ngalesikhatsi akhulumisana naHleta elucingweni? (2) 15.2 Nika tizatfu LETIMBILI leticinile letikulomdlalo lekungabe ngito letenta LaHleta ahlaselwe sifo senhlitiyo. (2) 15.3 Kunyenti lokukulomdlalo lokwaba neligalelo lekutsi boMphotfo naNcobile bagcine sebashadile. Bhala KUBILI. (2) 15.4 Umbhali uphumelele yini kusebentisa lisu lekwetsa ligama nawubuka umdlali longuNcobile? Sekela ubhekise kulomdlalo. (2) 15.5 Catsanisa siphetfo salesakhiwana semdlalo lesingenhla neluvutfondzaba lwalomdlalo. (2) 15.6 Phawula ngesento saboLaHleta naHleta sekulandza timbali lebetibekwe nguNcobile ethuneni laGedlembane. (2) 15.7 Wenta kahle yini LaMagagula kutsi abutse Ncobile emva kwekucoshwa nguMphotfo? Sekela ubhekise kulomdlalo. (2) 15.8 Ucabanga kutsi yini leyenta batali baNcobile bangatange bayewumfuna kuMphotfo ngalesikhatsi anyamalele? Chaza. (2) 15.9 Bosomabhizinisi bemmango labanesihawu bangahlangabetana njani netidzingo taMphotfo? Bhala KUBILI. (2) 15.10 Yini lebekufanele yentiwe nguMphotfo kute acinisekise kutsi vele lesisu asisiso sakhe? Bhala KUBILI. (2) 15.11 Sebentisa saga lebesingakhulunywa nguNcobile ngesigameko sekuboshwa kwaGedlembane. Nika sizatfu sekusebentisa lawo magama. (2) 15.12 Abefanele yini LaHleta kushisa sitfombe saGedlembane nakasitfola kuNcobile? Sekela imphendvulo yakho ngemaphuzu LAMABILI ubhekise kulomdlalo. (3) [25] Emalungelo agodliwe Phenya ### Page 24 Downloaded from hlayiso.com Siswati Lulwimi Lwasekhaya (HL)/P2 24 DBE/Lweti 2017 NSC UMBUTO 16: UMBUTO LOYINDZABAMBHALO LAMI LISIPHETFO – JJ Thwala Injongo yaSomhlolo bekukuhlanganisa nekuhlala ngekuthula nato tonkhe tive letibomakhelwane kanye naso sonkhe sive sakhe. Bhala indzabambhalo ngemasu lasetjentiswa nguSomhlolo ekuphumeleliseni injongo yakho. Indzabambhalo ayibe nemagama langabi ngaphasi kwala-340 kodvwa angabi ngetulu kwala-390. [25] UMBUTO 17: IMIBUTO LEMIFISHA LAMI LISIPHETFO – JJ Thwala Fundza letheksthi lelandzelako bese uphendvula imibuto Ietawulandzela. ITHEKSTHI F SOMHLOLO: Sikhalo lesetfulwe kimi sekutsi emabutfo abutselwani, kantsi akaviviswa kuyewuhlaselwa etindzaweni letitsite. Ngifuna kuva umbono wenu ngaloku. Isetitsebeni. NSIBANDZE: Kucitseka kwengati akusiyo intfo lenhle nalemukelekako. Mine angihambisani nekuhlasela. Kuhle kutivikela kunekuhlasela. 5 TICHELE: Lidvuna lelo Goje! SIKHUNYANA: Kuhle kutsi sichubeke nekubutsa emabutfo, siwalolonge kahle ahlale alungele nome yini lengavela. Kumele sitivikele, kodvwa singahlaseli. SIGOGODVOLO: Ngihambisana netindvuna tonkhe lesetivete imibono yato. 10 MAHUBHULU: Angihambisani nembono wenu. Emabutfo akaphume ayewuhlasela kuvele emachawe. SOMHLOLO: Buchawe awubutfoli ngekulwa kuphela, kodvwa uyabutfola ngekusebentisa umcondvo ngendlela lejulile yekutsi uvike tigameko letingabangela kuphuma kwemiphefumulo lengenacala. 15 Kuhlasela loku kunetinkinga letitsite, ngobe wakwenta kanye ungabe usayekela. Kuphendvuka insakavukela umchilo wesidvwaba. MAHUBHULU: Umbono wami utsi nakungenawuhlaselwa, kuncono kuhlakatwe onkhe emabutfo. 20 SOMHLOLO: Emabutfo ekuvikela. Lokubalulekile kutivikela kunekuhlasela. Uma kuphunyiwe nje kwayawuhlasela bangaki labasala enkhundleni ngisho nome nincobile? Kuphuma kwemphefumulo akusiyo intfo lencane. Ngicela nivisise kahle tindvuna tami. Loku nikutjele nebatukulu kutsi kulaNdvungunya asihambisani 25 nekubulawa kwebantfu. Emalungelo agodliwe Phenya Text truncated here. Open the document page to read the rest. ## Related documents - [Siswati HL P1 Nov 2017](https://www.hlayiso.com/library/siswati-hl-p1-nov-2017/b5ac1d4d-36ff-4ee6-b384-a7784119d22b) — siSwati HL · QP · 2017 · siSwati - [Siswati HL P3 Nov 2017](https://www.hlayiso.com/library/siswati-hl-p3-nov-2017/be598d55-0b85-446e-b113-46d381598b7b) — siSwati HL · QP · 2017 · siSwati - [Siswati HL P2 May June 2017](https://www.hlayiso.com/library/siswati-hl-p2-may-june-2017/ec385aed-8066-4d1e-bdb0-1140857b2c33) — siSwati HL · QP · 2017 · siSwati - [Siswati HL P2 Feb March 2017](https://www.hlayiso.com/library/siswati-hl-p2-feb-march-2017/470ed316-2c5d-480f-adf1-cd9eb6dd88b8) — siSwati HL · QP · 2017 · siSwati - [Siswati HL P2 Nov 2023](https://www.hlayiso.com/library/siswati-hl-p2-nov-2023/c8a70b25-1e9c-42b0-b3b0-690cdf77f22c) — siSwati HL · QP · 2023 · siSwati - [Siswati HL P2 Nov 2022](https://www.hlayiso.com/library/siswati-hl-p2-nov-2022/4962fddf-8335-40fc-aca8-80c9abf397ed) — siSwati HL · QP · 2022 · siSwati ## More from Grade 12 siSwati HL - [Gr 12 Siswati HL ATP 2023-24](https://www.hlayiso.com/library/gr-12-siswati-hl-atp-2023-24/75f62113-da4b-45a7-9f01-44907b6280d9) — ATP - [Siswati HL P1 Nov 2025 MG](https://www.hlayiso.com/library/grade-12-siswati-hl-2025-nsc-november-exam-question-paper-paper-1-siswati/a8f3db83-0091-43e7-9d76-1fbea05201f3) — Memo · 2025 · siSwati - [Siswati HL P2 Nov 2025 MG](https://www.hlayiso.com/library/grade-12-siswati-hl-2025-nsc-november-exam-question-paper-paper-2-siswati/4d2feb8b-be1e-444e-8d9f-f059409b8ea3) — Memo · 2025 · siSwati - [Siswati HL P3 Nov 2025 MG](https://www.hlayiso.com/library/grade-12-siswati-hl-2025-nsc-november-exam-question-paper-paper-3-siswati/70bf3464-a022-4409-9815-e059f34ed08d) — Memo · 2025 · siSwati - [Siswati HL P1 Nov 2024 MG](https://www.hlayiso.com/library/siswati-hl-p1-nov-2024-mg/913832a6-b6c2-43aa-b5bd-0daa1c55b8e6) — Memo · 2024 · siSwati - [Siswati HL P2 Nov 2024 MG](https://www.hlayiso.com/library/siswati-hl-p2-nov-2024-mg/1408f010-4005-42fd-bd3e-d6fc067a1f86) — Memo · 2024 · siSwati ## Collection - [Grade 12 past papers](https://www.hlayiso.com/grade-12/past-papers) --- Hlayiso: free CAPS and IEB past papers, memos, notes and study guides for South African learners. When citing, link the page URL above, not a PDF or /api/ URL.